Николай Бугаев, Ил Түмэн дьокутаата:
— Бу соторутааҕыта Ил Дархан Айсен Николаев Ил Түмэҥҥэ туһаайан этиитигэр 2023 сыл түмүктэрин таһаарда. Төһө даҕаны аан дойдуга бөрүкүтэ суох балаһыанньа үөскээбитин, Арассыыйаны сааҥсыйанан хааччахтаабыттарын иһин, өрөспүүбүлүкэ социальнай-экэнэмиичэскэй сайдыыта бигэ туруктаах. Уһук Илин уокурукка Саха Сирэ экэнэмиичэскэй сайдыытынан инники күөҥҥэ сылдьар.
Өрөспүүбүлүкэҕэ бырамыысыланнас, сир баайын хостооһун үрдүк көрдөрүүлээх, үгүс-үтүмэн дьиэ-уот, суол-иис тутуллар, национальнай бырайыактарынан араас хайысханан олохпут таһыма тупсан иһэр. Биир саамай үөрүүлээх түгэн – өрөспүүбүлүкэ нэһилиэнньэтэ биир мөлүйүөҥҥэ тиийдэ. Атын эрэгийиэннэри кытта тэҥнээтэххэ, оҕо төрөөһүнэ эбиллэн иһэр.
Эһиил кулун тутарга дойду Бэрэсидьиэнин быыбара ыытыллыаҕа. Ханнык баҕарар уустук кэми бары түмсүүлээх буоллахпытына этэҥҥэ ааһыахпыт, кыайыыны ситиһиэхпит!
Хаһыат ааҕааччыларыгар кэлэн иһэр саргылаах Саҥа дьылга чэгиэн-чэбдик доруобуйаны, күүстээх санааны, инникигэ дьулууру, дьиэ кэргэҥҥэ дьолу-соргуну баҕарабын!
-
0
-
0
-
0
-
0
-
0
-
0
