Бурдук хаһаайыстыбалара билигин бааһына сиигин саптарыыга үлэлии сылдьаллар. Бу үлэҕэ бастакынан Мэҥэ Хаҥалас улууһуттан «Тумул» кэпэрэтиип, Уус Алдан улууһуттан «Биэттэ-Агро» ХЭТ туруммуттар. Сири оҥоруу өрөспүүбүлүкэтээҕи сулууспатын чахчытынан, ыам ыйын 13 күнүнээҕи туругунан, 3 тыһ гектар (Мэҥэ Хаҥаласка 918, Уус Алдаҥҥа 25 гектар, Аммаҕа 1463, Хаҥаласка 170, Намҥа 20, Дьокуускайга 212 гектар) бааһына сиигэ саптарыллыбыт. Бааһыналарга 9 тыһ. туонна уоҕурдуу киллэриллибит. Барыта 500 кв. миэтэрэ иэннээх тэпилииссэ бүрүллүбүт.
– Бүгүн видео-кэмпириэнсийэ киэбинэн улуустары кытары сааскы ыһыыга анаммыт сүбэ мунньаҕы ыыттыбыт. Билигин хаһаайыстыбалар бааһына сиигин саптара уонна уоҕурдуу киллэрэ сылдьаллар. Ыһыы үлэтин ыам ыйын 20 күнүттэн саҕалыахтара, ону көрсө тыраахтардары өрөмүөннээһин, сири таҥастыыр агрегаттары сөргүтүү үлэтэ түмүктэнэн эрэр, – диир тыа хаһаайыстыбатын уонна ас-үөл бэлиитикэтин миниистирин солбуйааччы Сахаяна Павлова.
Кураан чинчитэ биллэринэн, сүбэ мунньахха бааһына сиигин өрүсүһэргэ, ыһыы үлэтин хаачыстыбалаахтык агротехнологияны уонна кыраапыгы толору тутуһан ыытар сорук туруорулунна. Сиртэн үүнээйини ылыыга, мелиорацияҕа уонна материальнай-тиэхиньиичэскэй хааччыйыыга департамент салайааччыта Вячеслав Гаврильев этэринэн, ыһыыга наада буолар сиэмэтэ сүрүннээн баар, тиийбэт сиэмэ тимир суолунан аҕалыллан, улуустарга тиэрдиллэ сылдьар эбит диэн министиэристибэ пресс-киинэ иһитиннэрэр.
-
0
-
0
-
0
-
0
-
0
-
0
