Издательский дом Редакция Подписка
Погода в Якутске: . 16 oC

Бэс ыйын биир кэрэ күнэ таатталары кэрэ эйгэ түһүлгэтигэр киин куоракка баар «Үргэл» арт-галереяҕа муста.

Бэс ыйын биир кэрэ күнэ таатталары кэрэ эйгэ түһүлгэтигэр киин куоракка баар «Үргэл» арт-галереяҕа муста.


«Тааттам – иэйэр кутум» диэн быыстапка киэн тутта ааттыыр дьоммут: саха ойуулуур-дьүһүннүүр ускуустубатын төрүттээччи, идэтийбит худуоһунньук, бастакы норуодунай худуоһунньук, этнограф, фотограф Иван Васильевич Попов төрөөбүтэ 150 уонна бэйэтин кэмигэр «Саха Пластова» диэн ааттаммыт, өҥ дьүөрэлэһиитин маастара, Саха АССР ускуустубатын үтүөлээх деятелэ, живописец, Иннокентий Дмитриевич Корякин көҕүлээһининэн, салалтатынан, Саха Өрөспүүбүлүкэтигэр тыа сиригэр бастакынан Харбалаах бөһүөлэгэр хартыына галереята тэриллибитэ 50 сылларыгар ананан тэрилиннэ.

м-_4.jpeg

Ойуулуур-дьүһүннүүр ускуустуба сайдыытыгар сөҕүмэр кылааты киллэрбит, ойуу тылынан кэрэ эйгэни бар дьоҥҥо анаабыт икки үтүө дьоммут аатын саҥа кэм талааннаах тарбахтаах биир дойдулаахтарбыт айымньыларын кытта ситимниир.
Эҕэрдэ тылы улуус баһылыга Айаал Бурцев, живописец, Саха Өрөспүүбүлүкэтин норуодунай худуоһунньуга, Российскай Федерация үтүөлээх худуоһунньуга, Саха Өрөспүүбүлүкэтин ускуустубатын үтүөлээх деятэлэ, Анаабыр улууһун бочуоттаах олотооҕо Юрий Спиридонов, Дьокуускай куорат баһылыгын тыа хаһаайыстыбатын, атыы, урбаан, туризм боппуруостарыгар солбуйааччы, «Таатта» түмсүү салайааччыта Владимир Аржаков, Иван Попов эттилэр.

м_-_5.jpeg

Улуус баһылыга Айаал Семенович норуот уус-уран маастарыгар, Москва куоракка ыытыллыбыт быыстапка үс төгүллээх кыайыылааҕар, Ил Дархан стипендиатыгар Петр Луковцевка үйэ аҥардаах сааһынан Бочуотунай Грамотаны, ону сэргэ Таатта нэһилиэгин баһылыгын Егор Павлов эҕэрдэ суругун туттарда.

м-10.jpeg

Туоска, сөрүөҕэ маастар Валерия Потаповаҕа Арассыыйа Худуоһунньуктарын айар сойууһугар киирбитин туоһулаан, РХАС тэрилтэ чилиэнэ, норуот маастара Прасковья Стручкова дастабырыанньа туттарда.

м-_7.jpeg
Быыстапка үөрүүлээх лиэнтэтин улуус баһылыга Айаал Бурцев, «Үргэл» арт-галерея салайааччыта Юрий Спиридонов уонна  Иван Попов кырыйдылар. Быыстапкаҕа Саха АССР ускуустубатын үтүөлээх деятелэ, живописец Иннокентий Корякин, Саха Өрөспүүбүлүкэтин ускуустубатын үтүөлээх деятелэ, живописец Иван Попов, норуодунай худуоһунньуктар скульптор Максим Павлов, живописец Гавриил Петров, Арассыыйа үтүөлээх худуоһунньуга, СӨ ускуустубатын үтүөлээх деятелэ, график Мария Рахлеева, Арассыыйа Худуоһунньуктарын сойууһун чилиэннэрэ скульптор Николай Огонеров, живописецтар Вячеслав Яроев, Иннокентий Корякин, муосчут Дмитрий Постников, худуоһунньуктар Иван, Гаврил Поповтар, Семен Нучеканов, Наталья Петрова, үгэс сүппэтин туһугар бэйэлэрин кылааттарын киллэрэр көмүс тарбахтаах тимири, маһы ыллатар уустар Борис Неустроев-Мандар Уус, Афанасий Лопатин, Федор Чярин, Сарыал Билюкин, Виктор Протопопов, Константин Луковцев, Эдуард Тарабукин, Петр Луковцев, Леонид Васильев, Василий Протопопов, Василий Лопатин, Дмитрий Евграфов, Иван Табунанов, уран тарбахтаах иистэнньэҥнэрбит Арина Большакова, Анна Мандарова, туойдьут Ульяна Матвеева, кыл маастара Валерия Потапова, туосчуттар Мотрена Малышева, Тамара Яроева, тириинэн иистэнэр маастар Светлана Луковцева үлэлэрэ турдулар.

м_-_11.jpeg

Бу курдук өрөспүүбүлүкэбит киин куоратын галереятын саалаларыгар талыы-талба Тааттаттан тардыылаах, иэйии күүстээх алыбар куустарар биир дойдулаахтарбыт бииртэн биир үлэлэрин хас биирдии көрөөччү кинилэр айылҕаттан бэриллибит дьоҕурдарын, олоххо көрүүлэрин сааһылаан-наардаан иһийэ, сөҕө-махтайа көрүөхтэрэ турдаҕа.

м_-_8.jpeg

Быыстапка идеятын ааптарынан Вячеслав Яроев,  партнердарынан Бырааттыы Мординовтар ааттарынан уонна «Мандар Уус» саха олоҕун кэлим түмэллэрэ буоллулар. Үтүө-мааны, барҕа махтал тылларын «Үргэл» галерея салайааччытыгар Юрий Васильевичка, галерея үлэһиттэригэр, улууспут дьаһалтатыгар, "Мясной двор" тэрилтэ салайааччытыгар Спартак Петровка, "Баай Ас" СХПК салайааччытыгар Семен Андросовка аныыбыт.  Айылҕа. Дьоҕур. Айымньы ситимнэһэр киинигэр үтүмэн үгүс тэрээһиннэри, таһаарыылаах үлэни баҕарабыт.
Таалар налыы хонуулаах Таатта эбэбит, наҕыллык устар ыраас уулаах Аммабыт, дохсун сүүрүктээх Алдаммыт үйэттэн үйэҕэ талааннары үөскэтэр, чулуулары төрөтөр алыптара ньассын от курдук силигилии турдун, айар куту төрөтө турдун диэн алгыспытын аныыбыт.

м-_3.jpeg

Быыстапка бэс ыйын 9-22 күннэригэр үлэлиэҕэ.

  • 10
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением