Тааттабыт улууһун «Харыстаана» иис сыаҕын иистэнньэҥнэрэ көмүскүүллэр. «Харыстаана» иис сыаҕын Саха Өрөспүүбүлүкэтин үөрэҕириитин туйгуна, Д.А.Петров аатынан 2 №-дээх орто оскуола технологияҕа учуутала Анна Никифорова иккис сылын салайар. Кини салалтатынан үтүө санаалаах эбэлэрбит, ийэлэрбит Галина Дедюкина, Анастасия Оросина, Марианна Мочкина, Саргылаана Слепцова, Валентина Собакина, Аграфена Баишева, Надежда Поисеева, Светлана Мессеева уонна Туйаара Иванова иис сатабылын туһанан, илиилэрин сылааһын иҥэрэн ис сүрэхтэриттэн иистэниэхтэрэ.
Күрэскэ Таатта, Мэҥэ Хаҥалас, Чурапчы, Кэбээйи, Нам, Үөһээ Бүлүү, Уус Алдан, Горнай, Булуҥ улуустарын уонна «Саха булт» тэрилтэ иистэнньэҥнэрэ кытталлар. Күрэскэ тактическай рубашкалар, футболкалар, ис таҥастар, куллукулар, шортиктар, х/б көстүүмнэр, сэлээппэлэр, мөһөөччүктэр тигиллиэхтэрэ. Манна даҕатан суруйдахха, былырыын баччаларга «Иис-уус ыһыаҕа» диэн ааттанан, маннык күрэс Дьохсоҕоҥҥо тэриллибитэ.
Ис санааҕытынан, сүрэххитинэн кыттар иистэнньэҥнэргэ ситиһиини баҕаран туран, хас биирдиигитигэр барҕа махталбытын тиэрдэбит. Эһиги илиигит сылааһа, алгыстаах тылгыт анал дьайыыга сылдьар биир дойдулаахтарбытыгар тиийэн көмүскэ буоллун, харысхал буоллун.
-
1
-
0
-
0
-
0
-
1
-
0
