Кинилэри кытары улуус баһылыгын бастакы солбуйааччы Сардаана Стручкова, эппиэтинэстээх улуус дьаһалтатын управлениеларын салайааччылара, Киин балыыһа кылаабынай бырааһа, нэһилиэнньэ дьарыктаах буолуутун үлэһиттэрэ кыттыыны ыллылар.
Көрсүһүүгэ төрөппүттэр, саллааттар кэргэттэрэ кытаннар, долгутар боппуруостарыгар хоруйдары ыллылар. Кэлбит саллааттарбыт туох өҥөнөн, чэпчэтиинэн туһаналларын, доруобуйаларын чэбдигирдэллэригэр реабилитация ааһалларын, үөрэхтэнэн, идэ ылан, үлэлииргэ-хамсыырга ханнык хайысхалар баалларын туһунан сырдаттылар.
– Координационнай киин АБДь-га сылдьар уолаттарбыт Сокуонунан көрүллэр бары чэпчэтиини сөптөөхтүк туһаналларыгар күүстээх үлэни ыытар. Ону таһынан, сураҕа суох сүппүт, бааһырбыт буойуттар, анараа сылдьар уолаттар дойдуларыттан тиийэр көмөнү туталларыгар о.д.а. боппуруостары көрөбүт.
Биһиги бары, уолаттарбыт этэҥҥэ эргиллэн кэлэллэригэр ис сүрэхпититтэн кыһаллабыт. Федеральнай сокуоҥҥа олоҕуран, төлөбүрү толору туһаналларын хонтуруоллуубут, күүс-көмө буолабыт. Холобур, бааһырыы ылан баран, төлөбүрүн ситэ ылбатах уолаттар аҕыйаҕа суохтар. Байыаннай мэдиссиинэ хамыыһыйата көрүүтүнэн сөптөөх түмүгү биэрэрин, элбэх оҕолоох дьиэ кэргэнтэн барбыттар, биир дьиэ кэргэнтэн икки эр киһи сылдьар буоллахтарына, биирдэрин тыылга тахсан, сулууспалыырын туруорсабыт, соҕотох аҕа буоллаҕына дьиэтигэр төннөрүн ситиһэргэ, сураҕа суох сүппүт саллааттар ааттарын тилиннэрэргэ о.д.а. боппуруостарга күүстээх үлэни ыытабыт.
Кэнники кэмҥэ 18 саастарын туолан, Ийэ дойду иннигэр Ытык иэстэрин толоро сылдьар саллааттары кытары үлэбитин күүһүртүбүт. Сорох байыаннай чаастарга контракт баттаспыт түгэннэрэ тахсыталаатылар. Балаһыанньаны учуоттаан, бэйэлэрин, төрөппүттэрин, дуоһунастаах офицердарын да кытары сирэй көрсөн, контрактарын көтүрэргэ киэҥ хабааннаах кэпсэтии барда, – диэн Иван Винокуров сырдатта.
Ийэ дойду иннигэр Ытык иэстэрин чиэстээхтик төлөөбүт, сулууспалыы сылдьар хорсун буойуттарбыт туһугар ыытыллар үлэ үтүө түмүктэрдээх эрэ буоллун диэн баҕа санаабытын этэбит. Төрөөбүт дойдуларыгар кинилэри тапталлаах дьоно-сэргэтэ ахталлар, суохтууллар.
Сонун төрдө уонна хаартыска: "Үлэ күүһэ", Вячеслав Алексеев
-
0
-
0
-
0
-
0
-
0
-
0
