Уопсастыба

Бары учууталлары, үлэһиттэри, үөрэнээччилэри уонна төрөппүттэри, ыҥырыылаах ыалдьыттары гимназия дириэктэрэ Валентина Пермякова эҕэрдэлээтэ. Ааспыт үөрэх дьылын сүрүн ситиһиилэрин билиһиннэрдэ. Быйыл гимназияҕа 1200 оҕо үөрэнэрин, маҥнайгы кылааска үс кылаас-кэмпилиэгинэн 105 кырачаан киирбитин, уон биирис кылааска 107 үөрэнээччи баарын эттэ. Оҕолорго туйгуннук үөрэнэргэ, иитэр-үөрэтэр үлэһиттэргэ айымньылаахтык үлэлииргэ баҕарда.

Ил Түмэн Бэрэссэдээтэлин бастакы солбуйааччы Александр Жирков дириҥ ис хоһоонноох этиини оҥордо:

-- Күндү оҕолор, учууталлар, төрөппүттэр, ийэлэр аҕалар уонна эһэлэр-эбэлэр! Эһигини киһи аймахха барытыгар сыһыаннаах үөрүүлээх күнүнэн, саҥа үөрэх дьыла саҕаламмытын, итиитик-истиҥник эҕэрдэлиибин. Бүгүн биһиги дьиэ кэргэҥҥэ уратылаах күн. Саха гимназията 1992 сыллаахха, 32 сыл анара өттүгэр аһыллыбыта, онно маҥнайгы кылааска мин улахан уолум үөрэнэ киирбитэ. Оччолорго оҕону тургутуу кэнниттэн үөрэххэ ылаллара. Николай Чиряев араас ойууну оҥоро-оҥоро, оҕолортон тугу уруһуйдаабытын ыйытара. Төгүрүктэри оҥорбутугар мин уолум: «Ньолбуһах», – диэбит. Онуоха Николай Константинович үөрэн, киэһэ кэлэн миэхэ: «Уолуҥ ньолбуһаҕы кытары билэр эбит», -- диэн эппитэ. Бу гимназия туһунан идиэйэни Николай Константинович Чиряев бэйэтин биир санаалаахтарын кытары Сэргэлээххэ, университет 18-с куорпуһун тохсус этээһигэр, аспираннар уопсайдарыгар олорон иитийиэхтээн таһаарбыта. Оччолорго аспираннар онно олорор этибит. Доҕорум ол идиэйэтин Саха Өрөспүүбүлүкэтин бастакы Бэрэсидьиэнэ Михаил Ефимович Николаев өйөөн, Саха гимназията 1992 сыллаахха аанын аспыта. Авиатордар дьиэлэригэр. Оттон бу бүгүн маҥнайгы кылааска сиэним үөрэнэ киирдэ, инньэ гынан, лоп курдук 32 сыл буолан баран, бу кыһаҕа үөрэх дьыла аһыллар үөрүүлээх күнүгэр сиэммитин эҕэрдэлии эбээтинээн иккиэн кэлэн турабыт. Күндү төрөппүттэр, эһиэхэ да оннук элбэх буолуо, эһиги оҕолоргут, сиэннэргит Саха гимназиятыгар үөрэххэ киирбиттэринэн барыгытын өссө төгүл итиитик-истиҥник эҕэрдэлиибин.

Саха гимназията баҕа санааттан үөскээбитэ: күүстээх баҕа санааттан уонна күүстээх дьулууртан, биһиги өрөспүүбүлүкэбитигэр сахалыы өйдөөх-санаалаах, сахалыы куттаах-сүрдээх, ханнык баҕарар омук бэртэрин кытта тэҥҥэ турар ыччаттардаах, дьонноох-сэргэлээх буолуохтаахпыт диэн санааттан. Ол санаа, дьулуур билигин даҕаны Саха гимназиятын сүрүн суола буолар, онтон булгуруйумаҥ, онтон түһүмэҥ, онтон туораамаҥ. Иннигит хоту баран иһиҥ. Дойдугутугар, дьоҥҥутугар-сэргэҕитигэр туһалаах дьоннору иитэн таһаарыҥ диэн эһиэхэ, Учууталларга, алгыс тылларбын этэбин. Гимназия инникитин даҕаны ситиһиилээхтик үлэлии-хамсыы, Саха сирин ыччатын иитэ-үөрэтэ, уһуйа-такайа туруохтун!

Саха гимназиятыгар Билии күнүн туһунан сиһилии «Ил Түмэн» хаһыакка ааҕыаххыт.

Хаартыскаҕа Петр Попов (Ил Түмэн) түһэриитэ.