202-с уонна 203-с микро-оройуоннарга элбэх кыбартыыралаах дьиэлэр ыстаарыстылара Лидия Сыроватская уонна Ольга Алексеева норуот дьокутаата Мария Христофорованы көрсөн, “Энергосбыт” салайааччыларын кытары ити боппуруостарга онлайн-мунньах тэрийэригэр көрдөспүттэрэ. Дьокутаат Мария Николаевна көрдөһүүнү тута ылынан, бүгүн ити темаҕа анал онлайн-мунньаҕы тэрийэн ыытта. Тэрээһиҥҥэ «Энергосбыт” дириэктэрэ Наталья Корягина, “Энергсбыт” дириэктэрин солбуйааччы Светлана Кукушкина уонна “Энергосбыт” отделениетын начаалынньыгын солбуйааччы Саргылаана Аргунова уонна Набережнай уокурук олохтоохторо кыттыыны ыллылар. Уокурук олохтоохторо быһааралларынан, «Энергосбыт” элбэх кыбартыыралаах дьиэлэри салайар хампаанньалары (УК) кытта дуогабары көтүрэр кэмигэр, ол туһунан олохтоохторго сөптөөх иһитиннэриини оҥорботох. Олохтоохтор коронавирус дьаҥын кэмигэр кыһалҕаттан кыһарыйтаран, коммунальнай өҥө төлөбүрүн, төһө кыалларынан, онлайн-бырагыраама көмөтүнэн төлөһө сатаабыттар. Ол гынан баран, анал бырагыраама төлөбүрү тоҕо эрэ ылбат эбит. Итинтэн сылтаан коммунальнай өҥө төлөбүрүгэр олохтоохтор иэстэрэ мунньуллар аатыгар барбыт. Счетчиктары холбуур дуогабары түһэрсэргэ хайаан да тустаах хампаанньаҕа тиийиллиэхтээх эбит. Дьэ итини түһэрсэ охсор инниттэн халыҥ уочарат билиҥҥэ диэри адьас уҕараабат чинчилээх. Олохтоохтор бу кэлиҥҥи кэмҥэ гаас, уот төлөбүрэ үүнэ-тэһиинэ суох үрдээн эрэллэрин аһаҕастык биллэрдилэр. Холобурдуур буоллахха, 203-с микро-оройуонун 4-с корпуһун олохтооҕо “Энергосбыт” сайтыгар баар бэйэтин тус кэбиниэтигэр коммунальнай өҥө быһыытынан 3884 солк. төлүөхтээҕин туһунан этиллэ сылдьар буоллаҕына, дьиэтигэр подъеһыгар турар дьааһыгар 4924 солк. төлүөхтээҕин туһунан квитанция тигинээн кэлбит. Тоҕо маннык араастаһыылааҕый диэн ыйытыыга, тустаах хампаанньа салайааччылары сөптөөх эппиэти биэрбэтилэр эрээри, боппуруоһу тута быһаарсыахпыт диэн эттилэр уонна итинник ураты балаһыанньаҕа түбэспит киһи аадырыһын, төлөпүөнүн нүөмэрин суруннулар. Арай, бырагыраамаҕа сыыһа-халты, нууччалыы эттэххэ, «сбой» тахсыбыта буолуо диэн үрдүнэн соҕус хоруйу биэрдилэр.
«Энергосбыт» начаалынньыга этэринэн, 202-с микро-оройуон 9-с корпуһугар олорооччулар иэстэрэ 1 мөл. 700 тыһ. солк. тиийбит. Итинтэн сиэттэрэн, хампаанньа олорор дьиэ табаарыстыбатын (ТСЖ) суукка биэрбит. Ол аата баар иэһи суут көмөтүнэн ыларга туруммуттар. 522-с федеральнай сокуон чэрчитинэн, ресурсанан хааччыйар хампаанньалар аныгы дэниллэр счетчиктары бэйэтин үбүнэн-харчытынан туруоруохтаах. Бу үлэ 2020 сыл от ыйын 1 күнүттэн 2020 сылы хабан туран ыытыллыахтаах. «Энергосбыт” дириэктэрэ Наталья Корягина быһаарбытынан, тустаах хампаанньа Судаарыстыбаннай сыана бэлиитикэтигэр анал “өйдөөх” счетчиктары туруорууга коммунальнай өҥө тарыыбыгар киллэрэн биэрэргэ этии киллэрэр былааннааҕын туһунан иһитиннэрдэ. Ол аата счетчигы туруоруу ороскуотун олохтоохторго сүктэрэргэ былаанныыллар эбит.
Норуот дьокутаата Мария Христофорова «Энергосбыт” салайааччыларыгар кэккэ эрэкэмэндээссийэлэри этэн туран, Судаарыстыбаннай сыана бэлиитикэтин кэмитиэтигэр счетчигы туруоруу ороскуотун тарыыпка киллэрэр туһунан сөптөөҕүн, сөбө суоҕун туһунан ыйыталаһыах буолла.
-
0
-
0
-
0
-
0
-
0
-
0
