Өрөспүүбүлүкэ араас муннугар олорор үтүө санаалаах ийэлэрбит, эбэлэрбит, бу буолар турар быһыыга-майгыга илиилэрин уунан, туох кыаллары барытын оҥоро оҥороллор. Биир холобур буолар көстүү, таатталарга баарыттан үөрэр, киэн туттар. Ол курдук Саха Өрөспүүбүлүкэтин үөрэҕириитин туйгуна, Учууталлар учууталлара, иистэнньэҥ Анна Никифорова салайыытынан “Харыстаана” иис сыаҕын үлэлэтэрэ буолар.
Анна Егоровна сахалартан соҕотох “Албан Аат” уордьан толору кавалера Д. Петров аатын сүгэр Ытык Күөл орто оскуолатын технологиятын учуутала. Ботуруйуоттуу санааны ылынан, бэйэтин баҕатынан “Харыстаана” иис сыаҕын үлэлэтэр. Кинини сэргэ нэһилиэкпит үтүө-мааны Далбар Хотуттара Евдокия Оросина, Галина Дедюкина, Марианна Мочкина, Александра Бочурова, Валентина Собакина, Саргылаана Слепцова, Аграфена Баишева, Надежда Поисеева, Светлана Мессеева, Туяра Иванова, Розалия Аржакова үлэлииллэр. Ийэлэрбит, эбэлэрбит алгыстаах иистэрэ уолаттарбытыгар көмүскэ буолаллара саарбаҕа суох.
Балаҕан ыйыгар Иван Бочонин салайааччылаах “Тааттаавтодор” тэрилтэ Новосибирскай куораттан барыта 330 тыһ. солк. суумалаах иистэнэр таҥаһы, бырамыысаланнай оверлогу уонна икки иистэнэр массыынаны атыылаһан аҕалан, биэрдэ. Эбиитин таһаҕас тиэллэн кэлиитин уйунна. Иистэнэргэ флис, х/б, кулирка таҥас арааһа сомуогар тиийэ кэлэн, иистэнньэҥнэр күннэтэ туттар матырыйааллара хааччылынна. Анна Егоровна этэринэн, сэтинньи саҥата үс Амма нэһилиэктэринэн маастар-кылаас ыыта барарга былаанныыр.
"Кыайыы туһа" диэн бэйэлэрин кылааттарын киллэрэр дьоммутунан киэн туттабыт, холобур оҥостобут!
-
5
-
0
-
0
-
0
-
0
-
0
