Тус хоту сытар Дьааҥы улууһун Сайдыы бөһүөлэгэр уу 41 ыал дьиэтин уонна 82 ыал олбуорун ылан, муниципальнай суолталаах ыксаллаах быһыы-майгы эрэсиимэ биллэриллибитэ. Билиҥҥи туругунан, быстах олорор сиргэ 25 киһи, ол иһигэр 10 оҕо көһөрүлүннэ. Уу кэлбит бастакы күнүттэн, ол эбэтэр от ыйын 23 күнүгэр, «Полярные авиалинии» хампаанньа «Ми-8» бөртөлүөтүнэн Баатаҕайтан быыһааччылар уонна бастакы гуманитарнай көмө тиэрдиллибитэ.
Баатаҕайга уонна Дьокуускайга ыстааптар тэриллэннэр, Сайдыы ыалларыгар анаан аһы-үөлү, сылаас таҥаһы-сабы, туттар тэрили итиэннэ пенофон, изоспан, пакля о.д.а. курдук тутуу тэриллэрин хомуйуу тэриллэр. Бу үлэни Ил Түмэн дьокутаата Сергей Сивцев салайса-сүрүннэһэ сылдьар.
– Дьокуускайга гуманитарнай көмөнү хомуйуу икки сиринэн ыытыллар. «Биир ньыгыл Арассыыйа» баартыйа уопсастыбаннай ыстаабыгар, ол эбэтэр Курашов уулусса 24 №-гэр. Ону таһынан волонтердар Орджоникидзе уулусса 10 №-гэр, сарсыарда 10 чаастан киэһэ 21 чааска диэри үлэлииллэр. Бүгүн баҕар, бөртөлүөт барыа диэн 200 киилэ таһаҕаһы чөкөттүбүт. Понедельникка сөмөлүөт көтүөхтэх, онно анаан 2 туонна таһаҕаны бэлэмнии сылдьабыт, – диэтэ норуот дьокутаата Сергей Сивцев биһиги бу сарсыарда төлөпүөнүнэн кэпсэппиппитигэр.
Хаартыскалары Сергей Сивцев ыытта
-
2
-
0
-
0
-
0
-
0
-
0
