--Галина Иннокентьевна өр сыллаах, киэҥ далааһыннаах үлэтин норуот туһугар анаабыт, Арассыыйа уонна Саха Сирин дьиҥнээх ботуруйуота буолар. Кини Саха Өрөспүүбүлүкэтин Үбүн министиэристибэтигэр, Бырабыыталыстыбатыгар итиэннэ Москубаҕа, Бастайааннай Бэрэстэбиитэлистибэҕэ үлэлиир сылларыгар мэлдьи үрдүк көрдөрүүлэри ситиһэрэ, -- диэтэ Ил Дархан Айсен Николаев үрдүк наҕарааданы туттарарыгар.
Ил Дархан Галина Данчикова бүддьүөт процеһын, нолуок уонна үп-харчы бэлиитикэтин, тус сыаллаах судаарыстыбаннай бырагыраамалары таҥыыга айымньылаах үлэтин итиэннэ Уһук Илиҥҥи Федеральнай уокурук стратегическай суолталаах эрэгийиэнин быһыытынан, Саха Сирин сайдыытын саҥа тэтимин хааччыйыыга киллэрбит кылаатын үрдүктүк сыаналаата. Билигин Госдуума дьокутаатын быһыытынан сокуону оҥорууга таһаарыылаахтык үлэлиирин-хамсыырын, кини көмөтүнэн өрөспүүбүлүкэҕэ бөдөҥ эбийиэктэри тутуу, доруобуйа харыстабылын, социальнай эйгэ үбүлээһинин, сөмөлүөтүнэн көтүү субсидиятын кэҥэтии, төрүт олохтоох хотугу норуоттар бырааптарын араҥаччылааһын уо.д.а. боппуруостара быһаарыллалларын бэлиэтээтэ. Элбэхтэн биири холобурдаатахха, быйыл Аартыкаҕа уонна хотугу улуустарга тыын суолталаах “Хотугу собуос туһунан сокуон” ылыллыбытын эттэ.
--Биһиги урут хаарбах дьиэлэртэн дьону көһөрүү кыһалҕата далааһыннаахтык быһаарыллыа, итиччэ элбэх социальнай эбийиэк тутуллуо дии санаабат этибит. Билигин оннук кыахтар баар буоллулар. Билим, технология уонна култуура балысханнык сайдаллар. Ити барыта олус үөрдэр, -- диэтэ харда тылыгар Госдуума дьокутаата.
Галина Данчикова Исидор Барахов аатынан Судаарыстыбаннай бириэмийэ лауреатын аатын ылыы үрдүк чиэс буоларын долгуйа бэлиэтээтэ диэн Ил Дархан уонна Бырабыыталыстыба пресс-сулууспата суруйар.
-
1
-
0
-
0
-
0
-
0
-
1
