– Альбина Иннокентьевна өрөспүүбүлүкэҕэ нэһилиэнньэ социальнай бэлиитикэтин аныгы тиһигин төрүттээччилэртэн биирдэстэрэ. Кини өр сыллаах, таһаарыылаах үлэтэ нэһилиэнньэ социальнай көмүскэллээх буолуутугар сулууспалааһын үтүө холобура буолар. Альбина Иннокентьевна судаарыстыбаннай үлэ эйгэтигэр үлэлиир сылларыгар Арассыыйа Федерациятын социальнай бэлиитикэтин сайыннарыыга, Саха Өрөспүүбүлүкэтин нэһилиэнньэтэ социальнай көмүскэллээх буолуутугар сүҥкэн кылаатын киллэрбитэ, – диэтэ Бырабыыталыстыба Бэрэссэдээтэлин солбуйааччы Георгий Степанов.
Саха чулуу кыыһа Мария Нартахова 1947--1954 сс. социальнай хааччыйыы миниистиринэн үлэлээбитэ. Кини салалтатынан өрөспүүбүлүкэҕэ биэнсийэнэн хааччыйыы тиһигэ олохтоммута, үгүс оройуоннарга оҕо дьиэлэрэ, инбэлииттэр дьиэлэрэ, идэ биэрэр интэринээт-оскуолалар тэриллибиттэрэ. Мария Дмитриевна 1954 с. муус устар 12 күнүгэр саҥа талыллыбыт төрдүс ыҥырыылаах Үрдүкү Сэбиэккэ Президиум Бэрэссэдээтэлинэн талыллан, 1963 с. кулун тутарга диэри, ол эбэтэр тоҕус сыл үлэлээбитэ. Быйыл, тохсунньу 25 күнүгэр Мария Дмитриевна Нартахова төрөөбүтэ 120 сыла бэлиэтэммитэ.
Ил Дархан Айсен Николаев М.Д. Нартахова аатынан нэһилиэнньэ социальнай көмүскэлин эйгэтигэр сыллата туттарыллар Судаарыстыбаннай бириэмийэни олохтуур туһунан дьаһалы 2024 сыл от ыйын 1 күнүгэр таһаарбыта. Бастакы Судаарыстыбаннай бириэмийэ Саха Өрөспүүбүлүкэтин Сэбилэниилээх күүстэрин, быраабы араҥаччылыыр уорганнарын уонна сэрии, үлэ бэтэрээннэрин уопсастыбаннай тэрилтэтин бэрэссэдээтэлин бастакы солбуйааччы, РФ үлэ-социальнай эйгэтин туйгуна, Саха Өрөспүүбүлүкэтин өҥөнү оҥоруу эйгэтигэр үтүөлээх үлэһитэ Галина Лебедеваҕа туттарыллыбыта. 2025 с. лауреат үрдүк аата «Берегиня» дьиэ кэргэҥҥэ көмөлөһөр киин» судаарыстыба хааһынатын тэрилтэтин дьиэ кэргэттэргэ уонна оҕо аймахха социальнай өҥөнү тэрийиигэ бырайыактыыр салаатын сэбиэдиссэйэ, Саха Өрөспүүбүлүкэтин нэһилиэнньэтин социальнай көмүскэлин үтүөлээх үлэһитэ Антонина Сивцеваҕа иҥэриллибитэ.
"Ил Түмэн" издательскай дьиэ кэлэктиибин аатыттан биһиги Альбина Иннокентьевнаны үрдүкү наҕарааданан итиитик-истиҥник эҕэрдэлиибит, чэгиэн-чэбдик доруобуйаны, этэҥҥэ буолууну баҕарабыт.
Хаартыска: Саргын Скрябин түһэриитэ уонна эрэдээксийэ архыыба.
-
0
-
0
-
0
-
0
-
0
-
0
