Уопсастыба

Нэһилиэккэ култуура дьиэтэ 1956 с. аһыллыбыта, онтон өрөспүүбүлүкэ үрдүнэн биир тииптээх кулууптары тутууга хапсан, 1972 с. саҥа кулууп дьиэтэ аанын аспыта. Бу сылтан төһөлөөх элбэх кэнсиэр, испэктээкил көрдөрүллүбүтэ, үөрүүлээх тэрээһин тэриллибитэ буолуой? Ону нэһилиэк олохтоохторо бэйэлэринэн бигэргэтиэхтэрин эрэ сөп.

Култуура дьиэтигэр 2017 с. Саха АССР култууратын үтүөлээх үлэһитин Николай Колодезников аата иҥэриллибитэ. Николай Иванович өр сылларга нэһилиэк библиотекарынан үлэлээбитэ, сыана бэтэрээнин быһыытынан солбуллубат артыыс, бастыҥ уопсастыбанньык буолан, аата төрөөбүт нэһилиэгин култууратын киинигэр иҥэриллибитэ.

Нэһилиэк сайдыытын кэрдиис кэмнэригэр култуура киинигэр элбэх салайааччы, исписэлиис үлэлээн ааста. Култуура дьиэтин дириэктэрэ Елена Степанова сатабыллаах салайыытынан сэргэх, сонун тэрээһиннэр: «Нэһилиэк төрөөбүт күнэ», «Эдэр исписэлиис күнэ» куонкурус уо.д.а. сыллата ыытыллаллара үтүө үгэскэ кубулуйда.

– Быйылгы сезон «Истиҥ эҕэрдэ, Учуутал киһиэхэ» диэн олоҕу тутааччы, хас биирдии идэ акылаатын оҥорооччу учууталларга анаммыт дьоро киэһэнэн арылынна. Кулууп дьиэ учууталларынан, оҕо ускуустубатын оскуолатын преподавателлэринэн, уһуйаан иитээччилэринэн туолла. Манна «Ааспыт кэми сэгэтэн» диэн оҕо саас хаартыскатынан таайбараҥ ыытыллан улахан интириэһи тарта. Тэрилтэлэринэн минньигэс астаах сандалы тардыллан, сэргэх кэпсэтии таҕыста. Эҕэрдэ тыллар, ырыалар күндү дьоммутун сэргэхситтэ, үөрүүлэрин үрдэттэ, – диэн кэпсээтэ дириэктэр. 

Нэһилиэк сайдыыта, олоҕо, биллэрин курдук, култуура киинин тула эргийэр. . Дьон сынньалаҥын тэрийээччилэргэ ситиһиилээх үлэни баҕарыаҕыҥ!