Куонкурус эрэгийиэннээҕи түһүмэҕин үһүс миэстэлээх кыайыылааҕа Алена Валерьевна Неустроева Чурапчытааҕы бэтэринээринэй управление биэлсэрэ. Кини 2005 сыллаахха Төҥүлүтээҕи училищены бүтэрэн бэтэринээр идэтин баһылаабыт уонна ол кэмтэн төрөөбүт улууһугар үлэлиир. Бастаан Түөйэ учаастагар, кэлин Төлөй Дириҥҥэ биэлсэрдээбит:
-- Мин кыра сааспыттан кыылга олус сыстаҕас этим. Төрөппүттэрим төһө даҕаны ынах сүөһү ииппэтэллэр, куоска, ыт оҕолорун кытары бодуруһарым. Онон ыралаах идэбин баһылаабытым.
Нэһилиэкпитигэр ынах-сүөһүнэн дьарыктанар биир улахан бааһынай хаһаайыстыбалаахпыт, маны сэргэ икки бэйэ дьарыктаахтар бааллар. Төгүрүк сыл хамсыыр харамайдары араастан эмтиибит, сиэмэлиибит, чэбдигирдэр туһуттан бары ньыманы туһанабыт.
Быйыл биһиги учаастакпытыгар икки игирэ оҕо төрөөбүтэ бэйэбит үөрүүбүт кэриэтэ буолла. Маннык түбэлтэлэр эриэккэс көстүү буолаллар, мээнэ хатыламмат. Онон төрөөбүт ынахха, ньирэйдэргэ улахан болҕомто ууруллар.
Мин санаабар, бэтэринээр олус наадалаах идэ. Киһи аймах бырааһа, эмчитэ суох табыллыбатын тэҥэ дьиэ сүөһүтэ, көтөрө бэтэринээрэ суох сатаммат. Бүтүн аан дойду үрдүнэн сыстыганнаах ыарыы элбэҕэ, быыһыгар киһи үөйбэтэх-ахтыбатах ыарыылара өрө туралларын истэбит. Онно биһиги бэлэммит, араас үөрэхтэри ааһабыт, куурустары истэбит.
Маннык улахан таһымнаах куонкуруска бастакыбын кыттабын, онон бары даҕаны долгуйабыт. Идэҕэ маастарыстыбаны үрдэтэр куонкурстар өссө даҕаны ыытылла туралларыгар баҕарабыт.
«Идэтинэн бастыҥ» Бүтүн Арассыыйатааҕы куонкурус 2012 сылтан ыытыллар. Былырыын дойдубут Бэрэсидьиэнин сорудаҕынан киэҥ далааһыннаахтык саҥардыллан, «Каадырдар» национальнай бырайыак сүрүн тэрээһинэ буолар.
-
2
-
0
-
0
-
0
-
0
-
0
