Быйыл турнирга Арассыыйа 10 эрэгийиэнин ыспарсымыаннара итиэннэ аҕыс судаарыстыба күүстээх бөҕөстөрө кыттыахтара. Турнир быйыл иккис сылын аан дойду таһымнаах ыытыллар. Сүрүн тэрийээччинэн Хапсаҕай аан дойдутааҕы федерацията буолар. Биллэрин курдук, саха успуордун биир саамай чаҕылхай турнирын бирииһэ – 6 мөлүйүөн солкуобай.
Турнир балаһыанньатын быһыытынан, эр дьон 57, 65, 75, 85, 95 уонна 95 киилэттэн үөһэ ыйааһыннарынан күүстээх бөҕөстөрү быһаарыахтара. Бэтэрээннэр (40-тан тахса саастаахтар) ортолоругар 60, 70, 80, 90 уонна 90 киилэттэн улахан ыйааһыннарга киирсиэхтэрэ. Кыайыылаахтарга 100-түү тыһыынча солкуобай, үрүҥ көмүс призердарга 70 тыһ. солк., боруонса мэтээл хаһаайыттарыгар 30 тыһ. солк. диэри харчынан бириистэр тутарыллыахтара, бэтэрээннэр туһааннааҕынан 50, 25 уонна 15 тыһ. солкуобайынан наҕараадаланыахтара.
Оттон 75, 90 киилэттэн ыарахан ыйааһыннаах бөҕөстөртөн муҥутуур кыайыылаах аатын ылбыттар 500-түү тыһ. солкуобайы, бриллианнаах мэтээллэри ылыахтара, чөмпүйүөн курунан уонна саха батыйатынан бэлиэтэниэхтэрэ.
Санатан эттэххэ, былырыын муҥутуур кыайыылаахтарынан Тимур Николаев (Саха сирэ), Балдан Цыжипов (Бурятия) буолбуттара.
Бу курдук улахан успуорт тэрээһинин аан дойду кэтээн көрүөҕэ. Оттон өрөспүүбүлүкэ олохтоохторо аан дойду таһымыгар тахсыбыт саха хапсаҕайын «Өрөгөй» успуорт киинигэр тутан олорон көрөр кыахтаахтар. Бу сырыыга тэлэбиидэнньэҕэ быһа көрдөрүү суох буолуоҕа, онон билиэти MOST сыһыарыы нөҥүө эбэтэр «Өрөгөйтөн» атыылаһаҕыт. «Хаҥалас хапсаҕайыгар» кэлэн, саха чулуу хапсаҕайдьыттарын өйөөҥ!
Хапсаҕай аан дойдутааҕы федерацията
Хаартыскаларга Мария Васильева (ЯСИА) 2024 с. түһэриилэрэ.
-
0
-
0
-
0
-
0
-
0
-
0
