С.Р. Кулачиков-Эллэй аатынан орто оскуола бары кылаастарыгар Эллэй уруоктара, кылаас чаастара буоллулар. Эллэйгэ аналлаах үөрүүлээх линейкаҕа Эллэй хоһооннорун үһүс кылаас оҕолоро «Талыы-кэрэ Сахам сирэ» төрөөбүт тылбытынан, «Эһиги миигин өйдүөххүт ...» хоһоону нууччалыы Винокуров Дьулус, английскайдыы тылынан Малышев Ариян, Софронов Күндээр аахтылар.
Саха тылын уонна литэритиирэтин учуутала Т.С. Григорьева Эллэй аатын үйэтитии, кини айымньыларын үөрэтэр-чинчийэр үлэлэр тустарынан сырдатта. Эллэйи бэйэтин кэмин биир чаҕылхай, дорҕоонноохтук туойбут уонна нарын лирическэй иэйиилээх бэйиэтин быһыытынан сырдатар «Үйэлэр тухары айымньыҥ тарҕаныа!» диэн кинигэ итиэннэ оҕолор уруһуйдарын, оҥоһуктарын быыстапкалара туруорулунна.
Өрөспүүбүлүкэ таһымнаах литэрэтиирэ бэстибээлигэр араас улуустартан, ол иһигэр, Муоматтан, Томпоттон, Кэбээйиттэн, Сунтаартан, Ньурбаттан уо.д.а. элбэх оҕо, төрөппүт, учуутал кыттыыны ыллылар. Бу күн Эллэй туһунан чинчийэр үлэлэри, дьүһүйүүлэри, хоһооннору, ырыалары иһиттибит. Кыттыыны ылбыт дьоммутугар дириҥ махталбытын тиэрдэбит.
Эллэй төрөппүт оҕолоругар Наталья Серафимовнаҕа, Иосиф Серафимовичка, Александр Серафимовичка, бука бары аймахтарыгар оскуола кэлэктиибин аатыттан өрөгөйдөөх үбүлүөйүнэн эҕэрдэлиибит уонна туох баар үтүөнү баҕарабыт!
Саха бастакы народнай бэйиэтэ Эллэй олоҕун сырдатар, кини айымньыларын үйэтитэр, ыччат дьоҥҥо тиэрдэр биһиги ытык иэспит буолар. Киэн туттар биир дойдулаахпыт өльөт-сүппэт айымньыларын ааҕарбыт, кини хоһоонноругар айыллыбыт ырыалары ыллыырбыт тухары, кини биһиги сүрэхпитигэр мэлдьи тыыннаах.
Дария Иванова, С.Р. Кулачиков-Эллэй аатынан Чычымах орто оскуолатын дириэктэрин иитэр үлэҕэ солбуйааччы
-
4
-
1
-
0
-
0
-
0
-
0
