Арассыыйа Ыксаллаах быһыы-майгы министиэристибэтин тэрийиитинэн, Аартыкатааҕы эспэдииссийэ ыалдьыттаата. Дьоруой куорат Мурманскайтан ылбыт үйэлээх уот кыымын аҕаллылар.
Саха Өрөспүүбүлүкэтин Ыксаллаах быһыы-майгы министиэристибэтин пресс киинин салайааччы Ксения Рахматулина иһитиннэрбитинэн, бу эспэдииссийэ Кыайыы 80 сылыгар ананар. «Куттала суох Аартыка» диэн үөрэтэр уонна чинчийии сыаллаах айан Арассыыйа 10 субъектарын хабыаҕа. Үйэлэргэ умуллубат уот Саха Сиригэр икки хонуктааҕыта кэлбитэ. Эспэдииссийэ өрөспүүбүлүкэ алта улууһугар нэдиэлэ устун айанныахтаах.
-- Бүгүҥҥү күҥҥэ 200 килэмиэтири айаннаатыбыт. Төҥүлүгэ Алсиб кистэлэҥ аэродромугар үлэлээбит лүөччүктэргэ анаммыт обелиска, улуу Кыайыыны уһансыбыт биир дойдулаахтарбытыгар анаан, Чурапчыга уонна бүгүн сахалартан соҕотох «Албан Аат» уордьан толору кавалера Дмитрий Ананьевич Петров дойдутугар, Таатта сиригэр-уотугар, үйэлээх уот кыымын аҕалан, Кыайыы болуоссатыгар уматтыбыт. Салгыы Уус Ньаранан Зырянкаҕа тиийиэхпит. Эспэдиисийэҕэ барыта сэттэ тиэхиньикэ, 42 киһи кыттар. Манна «Россгвардия» байыастара эмиэ бааллар. Таатта нэһилиэгин оскуолаларыгар патриотическай уруоктары ыытыахтара, – диэтэ Ксения Рахматулина.
Күн иккис аҥарыгар Кыайыы былааҕын көрсүү Ойуунускай аатынан норуот тыйаатырыгар ыытылынна. Киирии саалаҕа А.И. Софронов, Д.А. Петров ааттарын сүгэр Ытык Күөл оскуолаларын, А.Е. Мординов аатынан Тааттатааҕы лиссиэй, А.Е. Кулаковскай-Өксөкүлээх Өлөксөй аатынан Дьохсоҕон оскуолатын уо.д.а. үөрэнээччилэрэ «Чымадааҥҥа мусуой» быыстапкатын туруордулар. Быыстапкаҕа кэрэхсэбиллээх миэстэнэн Новгород уобалаһын Рамушево дэриэбинэтин таһыттан булуллубут сэрии саҕанааҕы эспэнээттэр буоллулар.
Кыайыы былааҕын «Албан Аат» уордьан толору кавалерын Дмитрий Петров аатынан оскуола үөрэнээччилэрэ, «Албан» байыаннай-патриотическай кулууп чилиэннэрэ Ньургун Эляков, Уйгун Борисов, Данил Белолюбскай киллэрдилэр. Эҕэрдэ тыллары улуус баһылыгын э.т. Руслан Захаров, Саха Өрөспүүбүлүкэтин Ыксаллаах быһыы-майгы министиэристибэтин иһинээҕи сулууспа полковнига Денис Фомин, анал байыаннай дьайыы бэтэрээнэ, старшай лейтенант Роберт Винокуров, Таатта улууһун бэтэрээннэрин сэбиэтин бэрэссэдээтэлэ Маргарита Попова, Д.А. Петров кыыһа Астра Петрова, Таатта улууһун бочуоттаах олохтооҕо, «Гражданскай килбиэн» бэлиэ хаһаайката Мария Андросова, үөрэнээччи Жанна Алексеева эттилэр.
Күн бүгүн, кыайыылаах норуот буойуннарын, үлэ бэтэрээннэрин сыдьааннара, эйэлээх олоххо олорор дьылҕабытыгар, чуумпуга сөҥүөрэн туран, ахтан-санаан, долгуйан аастыбыт.
Кыайыы былааҕын тэлээрэр күүһүн иҥэринэн, эспэдииссийэ салгыы айанныыр.
-
8
-
0
-
0
-
0
-
0
-
0