Дэкээдэ биир кэрэхсэбиллээх дьаһалынан олохтоох бибилэтиэкэҕэ оҕолорго өбүгэ оонньууларын билиһиннэрии буолла. Оҕо сылдьан оонньообут төрүт оонньууларбыт туһунан кэпсээтибит.
Урут оҕо барыта хаамысканы сөбүлээн оонньуура, оскуола үөрэнэ сылдьан, уһун биримиэнэ кэмигэр ким остуолга, ким муостаҕа төгүрүччү олорон оонньуур буоларбыт. Хаамысканы талаҕынан түөрт кырыы гына быһан оҥосторбут, бэл, чүмэчини кыһан эмиэ оҥосторбут. Иккис оонньуубут – хабылык этэ. Билигин саҥаттан тарҕаммыта кэрэхсэбиллээх. Илии оонньуута түргэнник өйдүүргэ, сымсатык хамсанарга, тарбах сайдарыгар туһата улахан. Оҕолорго хаамысканан уонна хабылыгынан оонньоон көрдөрдүбүт, хайдах оонньонорун быһаардыбыт. Оҕолор барахсаттар ону сөҕүү-махтайыы бөҕөтө буоллулар.
Өлөөн национальнай улууһугар Эбэҥки тылын сыла салҕанан бара турарынан, өбүгэбит саҕаттан тутта сылдьар малларбыт ааттарын сөргүтэр туһугар, 2014 сыллаахха култуура салаатын методиһа Вера Ларионованы кытары устубут биэриибитин көрдөрдүбүт. Бу устууга өбүгэ туттар маллара, таҥастара барыта эбэҥкилии тылынан этиллэр, онон төрөөбүт тылы билэргэ улахан суолталаах.
«Ураһаҕа киирдибит даҕаны, эбэҥки буолан хаалабыт», -- диибит. Ураһаҕа киирээт чымкаттан тутуһаҕын, онтон иһиккин иикээптииҥҥэ ыйыыгын. Бу үлэбит «Саха» НКИХ ыытар куонкуруһугар бастакы миэстэни ылбыт, саамай харыстанар, өбүгэни кытта ситимниир сэдэх уонна сэргэх матырыйаалбыт буолар. Оччолорго Вера Давыдовна олохтоох телеустуудьуйаҕа үлэлиирэ, кини биһикки элбэх тиэмэҕэ араас биэриилэри оҥорбуппут.
Өбүгэлэр көс олоххо тутта сылдьыбыт малларын туһунан биэриини өссө да киэҥ аудиторияҕа көрдөрөн кэнчээри ыччакка тарҕатар, кэпсиир наада. Ханнык баҕарар тиэмэҕэ методист үлэтэ улахан суолталаах. Вера Давыдовна билигин култуура салаатыгар методист быһыытынан үлэлии сылдьар, инникитин өссө да өбүгэбит дьарыктарын, олоҕун туһунан биэриилэри оҥоруохпут диэн баҕалаахпыт.
Түгэнинэн туһанан махтанабын эбэҥки тылын үөрэтэ сылдьар кийииттэрбитигэр -- Варвара Острельдинаҕа, Антонина Долгуноваҕа. Иккиэн ыраах Өлүөхүмэ кыргыттара, Өлөөнү иккис дойду оҥостон, таптыыр идэлэринэн үлэлии-хамсыы сылдьаллар. Өлөөҥҥө өр сылларга олорон үлэлээбит Светлана Михайлова эбэҥки тылын үчүгэйдик баһылаата. Кинилэр баар буоланнар, күн бүгүн оҕолорбут төрүт ийэ тылынан хоһоон ааҕаллар, ырыа ыллыыллар, араас таһымнаах куонкурустарга, кэнпириэнсийэлэргэ кытталлар.
Хаартыскалары Надежда Колодезникова ыытта
-
1
-
0
-
0
-
0
-
0
-
0
