Кирбэй нэһилиэгэр отчуоту ОДьКХ уонна энергетика миниистирэ Виктор Емельянов туруорда. Балыыһа тутуута, о.д.а. эбийиэктэргэ хапытаалынай өрөмүөн, хаарбах дьиэттэн көһөрүү бырагырааматынан 12 кыбартыыралаах дьиэ тутуута салҕанара этилиннэ. Эргиэн комплекса үлэҕэ киирдэҕинэ, ирдэбилгэ сөптөөх бородууксуйанан хааччыллыы баар буолуоҕа, “Якутоптторг” аҕалар аһын-үөлүн, чуолаан хортуоппуй, хаппыыста о.д.а. хаачыстыбата тупсуоҕа эрэннэрилиннэ. Суол-иис оҥоһуута бүгүн-сарсын иһинэн быһаарыллыбата өйдөнөр, үгүөрү үп-харчы наадатын учуоттаан, ханнык баҕарар тутууну ыытарга ирдэбиллэри тутуһан ымпыгын-чымпыгын үөрэтэн кэккэ сылларга күүтэбит.
Биһиги курдук сөрүүн сайыннаах дойдуга сылаас бэс ыйыгар араарыллан баран, атырдьах ыйын бүтүүтэ холбонорунан олорор дьиэлэр тымныылара этилиннэ. Онуоха дьиэ-уот 8 кыраадыстан намыһах буоллаҕына, олохтоох дьаһалта бэйэтэ дьаһал таһааран хочуолунайы үлэлэтэн, дьиэлэргэ сылаас баар буоларын ситиһиэхтээҕэ быһаарылынна. Биллэн турар, манна оттук-уматык саппааһын учуоттуур ирдэнэр. Ити курдук сир баайын, айылҕа, булт, уматык о.д.а. долгутар боппуруостарга бөлөх чилиэннэрэ сөптөөх хоруйдары оҥордулар. Олохтоохтор ыйытыылара, этиилэрэ боротокуолга киллэрилиннэ.
--Бу састаабынан кэлбит бөлөх эһиил уларыйбакка кэлэригэр кыһаллыахпыт, тоҕо диэтэххэ боротокуолга киирбит сорудахтар туолууларын ирдииргэ табыгастаах буолуо, -- диэтэ Виктор Емельянов.
Олохтоохтор бу сырыыга наһаа наадалаах эйгэ салайааччылара кэлбиттэрин, истиҥ уонна сиэрдээх көрсүһүү буолбутун бэлиэтээтилэр. Даҕатан этэр буоллахха, кэлиҥҥи сылларга былаастар отчуоттара, мунньахтар төрөөбүт төрүт сахалыы тылынан ыытыллар буолбуттара кэрэхсэбиллээх.
Отчуоттуур бөлөх чилиэннэрэ улуус дьаһалтатыгар нэһилиэнньэни кытары биирдиилээн көрүстүлэр. Онуоха элбэх киһи кэлбитин көрөн үөрдүм уонна итини дьон сайдыыга, ситиһиигэ тардыһарын, айылҕа, доруобуйа туһугар долгуйарын бэлиэтин быһыытынан сыаналаатым. Быйыл сиппэтэх кэлэр сылларга туоларыгар эрэнэбин. Отчуокка үлэлээбит биэдэмэстибэлэр бэрэстэбиитэллэригэр олохтоохтор ааттарыттан махталбытын тиэрдэбит, үлэлэригэр үрдүк ситиһиилэри баҕарабыт!
-
0
-
0
-
0
-
0
-
0
-
0
