Уопсастыба

Норуот дьокутаата Елена Голомарева кэллэҕин ахсын саҥа толкуйдары саҕар, олохтоохтор мунаарар боппуруостарыгар ыйыылары-кэрдиилэри биэрэр, сүбэлиир-амалыыр. Аартыка атын да улуустарын олохтоохторун санааларын истэр, кинилрэи кытары мэлдьи алтыһар. Ити курдук төрөөбүт-үөскээбит дойдутугар, дьонугар-сэргэтигэр тирэҕирэр буолан, тыйыс айылҕалаах хотугу улуустар кыһалҕаларын чэпчэтиигэ туһуланар сокуоннары ылыныыга кимиилээхтик киирсэр, Судаарыстыба Дууматыгар тиийэ туруорсар Ил Түмэн уопуттаах дьокутааттарыттан биирдэстэрэ .

Хас биирдии сокуон, сокуон барыла да буоллун, салгынтан, халлаантан кэлбэт. Наадалаах буолуо диир киһи араас уустук боппуруостары толкуйдуур. Маны барытын олохтоох нэһилиэнньэ этэр, хас биирдии быыбардааччы олоҕун инникитин көрөр, олох хаачыстыбата тупсарыгар кыһаллар. Ол иһин норуот бэйэтэ талбыт дьокутаатыгар туруорсуо диэн итэҕэйэн, эрэнэн олоххо көрүүлэри, боппуруостары көтөҕөр. Дьэ ону, дьокутаат сөптөөх диэбитин көрөн, наадалааҕын наардаан, болҕомтотун ууран сурукка тиһэн, үрдүкү салалтаҕа тиэрдэрэ, быһаартаран тэйэрэ бу -- норуотунан талыллыбыт дьокутааттар санныларыгар сүкпүт соруктара буолар. Ону барытын сүрүннээн, ситэрэн биэрии үгүс толкуйу, бириэмэни эрэйэрэ өйдөнөр. Елена Христофоровна көс олохтох табаһыт эбэҥки норуотун чулуу ыччата буолан элбэхтик айанныыр, сылайары билбэккэ барар-кэлэр, атын улуустар олохторун, үлэлэрин-хамнастарын билсэр. Ханнык бөһүөлэккэ туох тиийбэтин үөрэтэр, дьону кытта элбэхтик кэпсэтэр, ураты болҕомтотун Уһук хотугу, кытыы нэһилиэктэр тыын кыһалҕаларыгар уурар.

Ону үчүгэйлик билэр буоланнар, Кирбэй нэһилиэгин олохтоохторо норуот дьокутааттарын бэрт истиҥник-иһирэхтик көрүстүлэр. Үлэ бэтэрээннэр: Клара Кириллова, Ольга Васильева, Наддежда Колодезникова, Харыйалаахтааҕы оскуола-саад дириэктэрэ Христофор Васильев, нэһилиэк дьокутааттарын сэбиэтин бэрэссэдээтэлэ Сергей Тимофеев мунаарар хайысхаларынан элбэх ыйытыылары биэрэн, толору хоруйу иһиттилэр.

Отчуоттуур мунньахха Елена Христофоровнаны кытары Александр Сусоев кэлсибитэ туспа үөрүүнү үөскэттэ, эдэр киһи уопуттаах дьокутааты кытары бииргэ үлэлээннэр элбэҕи ситиһиэхтэрэ, Аартыка биэс улууһугар сытыытык турар боппуруостары хотуулаахтык быһаарыахтара.

Норуот дьокутааттара Кирбэй нэһилиэгин көхтөөх ыччаттарыгар, үлэ бэтэрээннэригэр Ил Түмэн Бочуотунай грамоталарын, махтал суруктарын туттартаатылар. Көрсүһүү кэнниттэн «Өлөөн» муниципальнай-унитарнай тэрилтэ иистэнэр сыаҕар сылдьан, үлэни-хамнаһы билистилэр. Бу табаһыттарга, олохтоох нэһилиэнньэҕэ тутаах тэрилтэ ыһыллыы-тоҕуллуу сылларыгар сабыллапн хаалбакка, күн бүгүнүгэр диэри үлэлии турарын иһин Розалия Томскаяҕа, эдэр иистэнньэҥнэргэ, салайааччыларга махтаннылар. Дьокутааттарбытыгар --  Елена Голомареваҕа, Александр Сусоевка сыралаах, уустук үлэлэригэр ситиһиини, тус олохторугар этэҥҥэ буолууну баҕарабыт!