“Инкит” хомунаалынай хаһаайыстыба салайааччыта Павел Типянов: “Билигин хайа да хаһаайыстыбаҕа орто үөрэхтээх оробуочай каадыр үлэлиир кэмэ, биһиги тэрилтэбитигэр силиэсэр, сварщик, электрик, сантехник наадалар. Үлэ көрдөнө кэлбит дьону үлэҕэ ыламмыт үөрэтэбит, ол эрээри биир-икки ый үлэлээт, сатаабаппыт диэтилэр да баран хаалаллар. Ол иһин оҕону эрдэттэн үлэлэтэ үөрэтиэххэ, кинилэр олоххо-дьаһахха наадалаах идэлэри баһылыылларын ситиһиэххэ”, - диэтэ. Полиция каадыры кытта үлэҕэ отделын салайааччы Айталина Ефимова бэрээдэги араҥаччылыыр идэҕэ ыччаттары тардарга эттэ.
Дьоҕус урбаан киинин салайааччы Аида Гоголева улууска атыылааччы, биэкэр, уо.д.а. оробуочай үлэһиттэр тиийбэттэрин бэлиэтээтэ. Култуура салаатын салайар Надежда Николаева Сунтаар Тойбохойун оскуолтын дириэктэрэ биэнсийэҕэ олорор эргиэн бэтэрээнэ оскуола үөрэнээччилэрин атыы-эргиэн ымпыгар-чымпыгар үөрэтэрин ситиспитин, уопуттаах атыыһыкка үөрэнэн, оҕолор бэйэлэрин миэстэлэрин булалларын туһунан кэпсээтэ. Оскуола үлэһиттэрэ оҕолору биһиги ыытар тэрээһиннэрбитигэр кытыннаран, кинилэр личность быһыытынан үүнэн-сайдан тахсалларыгар көмөлөһүҥ, «эһиги үлэҕит, биһиги киэммит” диири тохтоторго эттэ. Мин санаабар бу олус сөптөөх этии. Надежда Прокопьевна салайааччы быһыытынан ханна да сырыттар атын сиргэ дьон хайдах дьаһанан, айан-тутан олорорун үөрэтэ, үчүгэйи батыһар идэлээх.
“Өлөөн” МУП зоотехнига, улуус дьокутаата Марина Николаева: “Таба иитиитигэр каадыр тиийбэт, үлэҕэ ылабыт да хамнас кыратыттан тохтооботтор, сири-уоту билбэттэриттэн, өрөбүлэ суох үлэ сылаатын тулуйбаттар. Үксүлэрэ баахтанан үлэлээх алмаас үлэтин хамнаһыгар талаһан бараллар”, -- диэтэ.
Салгыы экономика, дьарыктаах буолуу киин, дьаһалта исписэлиистэрэ иһитиннэрии оҥордулар. Күн бүгүн улууска үрдүк үөрэхтэх 20 исписэлиис уонна оробуочай идэлээх каадырдар наадалара ыйылынна. Ыччаттар тоҕо олохсуйан үлэлээбэттэрин биир биричиинэтэ хамнас намыһаҕа, толору хааччыллыылаах дьиэ-уот тиийбэтэ, киин сиртэн ыраахпыт буолара этилиннэ. Оттон урут-уруккуттан олохтоохтор бары кыра хамнастаах үлэҕэ үлэлии-үлэлии оһох оттон, толору хааччылыылаах буолуохтааҕар биир дьиэҕэ хастыы да ыал буолан олорон кэлбэтэхпит дуо? Билигин дьиэни-уоту тупсарыыга элбэх чэпчэтии көрүллэрин, эдэр ыаллар, эдэр исписэлиистэр дьиэ тутталларыгар тирэх буолар бырагырааммалар баар буолбатахтар дуо? Отчуот көрдөрөрүнэн, маннык бырагыраамалары олоххо киллэриигэ өрөспүүбүлүкэҕэ инники күөҥҥэ сылдьар курдукпут да, тоҕо дьиэнэн хааччыллыы кыаллыбатый? “Төгүрүк остуол” кыттыылаахтара элбэх боппуруоһу ырытан, санааларын үллэстэн, кэскиллээх этиилэри оҥордулар.
Сырдатар-иһитиннэрэр эйгэҕэ үлэлиирбинэн маннык боппуруостарга санаабын атастастым, хас биирдии ыал, тэрилтэ, иитээччи олохтоох хаһыаты суруттаран ааҕара наадатын, урукку сылларга үлэлээн ааспыт чулуу табаһыттар, булчуттар, Ийэ дойдуну көмүскээбит буойуттар, улууһу салайбыт чулуу дьоммут тустарынан сырдатар үлэ барыахтааҕын эттим. Ханнык баҕарар эйгэҕэ солбук каадырынан бэйэбит иитэн таһаарбыт оҕолорбут буолуохтаахтарын умнар сатаммат. Билигин аныгылыы көрүүлээх ыччат үлэлиир кэмэ, ону салайан биэрээччи бэйэлэрин идэлэрин толору баһылаабыт наставниктар буолуохтаахтар. Ыччаттар дойдуларыгар сөбүлүүр идэлэрин баһылаан үлэлии кэллэхтэринэ, үлэ миэстэтин булан, үөрэтэр, көмөлөһөр буоллахха олохсуйуохтара. Эдэр киһи элбэххэ үөрэнэн, дьону кытта алтыһан, кытаанах усулуобуйаны тулуйдаҕына, дьиҥнээх каадыр буолар. Бэйэ-бэйэҕэ көмөлөһөн, эйиэнэ-миэнэ диэбэккэ биир сүбэҕэ киирдэххэ төрөөбүт дойдубутун сайыннарыахпыт, инники сылдьыахпыт.
-
0
-
0
-
0
-
0
-
0
-
0