Ил Түмэн вице-испиикэрэ, Байыаннай сулууспалаахтар, бойобуой дьайыылар бэтэрээннэрин дьыалаларыгар, патриоттуу өйгө-санааҕа иитии уонна уопсастыбаннай тэрилтэлэр боппуруостарыгар сис кэмитиэтин бэрэссэдээтэлэ Александр Подголов уонна норуот дьокутаата Иван Луцкан Доннааҕы Ростовка оробуочай сырыыларын бастакы күннэригэр АБДь кыттыылаахтара эмтэнэр байыаннай госпиталларыгар сырыттылар.
Дьокутааттар Саха Сириттэн сылдьар байыаннай сулууспалаахтары уонна кинилэр аймахтарын кытта көрүстүлэр. Тус баһыылкалары тиксэрдилэр, эмтэниигэ уонна дьайыы суонатыгар сылдьар байыастары өйүүр дьаһаллары дьүүллэстилэр.
Байыаннай сулууспалаахтар уонна кинилэр дьиэ кэргэттэрин өйөөһүн дьаһалларын туһунан кэпсээтилэр, эрэгийиэннээҕи чэпчэтиилэри быһаардылар, Саха Сирин парламенын сокуону көҕүлүүр үлэтин билиһиннэрдилэр.
Ол курдук, донской парламент хамыыһыйатын мунньаҕар Саха Сирин дьокутааттара кэллиэгэлэрин кытары АБДь кыттыылаахтарын уонна кинилэр дьиэ кэргэттэрин өйөөһүҥҥэ федеральнай таһымҥа кэккэ этиилэри дьүүллэстилэр.
Мунньахха АБДь кыттыылаахтарыгар уонна кинилэр дьиэ кэргэттэригэр сири бас билиигэ биэрэргэ сокуону тупсарыы наадатын туһунан боппуруос көрүлүннэ. Бу чэпчэтии ураты өҥөлөрүн иһин Арассыыйа Дьоруойа эбэтэр Арассыыйа Федерациятын уордьаннарынан наҕараадаламмыт АБДь кыттыылаахтарыгар көрүллүө. Маннык байыастарга, кинилэр сөбүлэһэр буоллахтарына, сир учаастактарын биэрэр оннугар атын социальнай өйөбүл чэпчэтиитин аныырга эрэгийиэннэр бырааптарын бигэргэтэргэ этии киирдэ. Холобура, харчынан төлөбүр эбэтэр сиргэ сэртэпикээти биэрии курдук өйөбүл буолуон сөп.
Маны таһынан, дьокутааттар РФ кыраасдана дьайыыга кыттыбыт чахчытын туоһулуур ыспыраапканы биэрии тула боппуруостары дьүүллэстилэр. Бу ыспыраапка өйөбүл миэрэлэрин биэрэргэ наадалааҕын уонна ыспыраапканы оборуона министиэристибэтиттэн эбэтэр Судаарыстыба өҥөтүн порталыттан ылыахха сөбүн бэлиэтээтилэр. Билиҥҥи туругунан ыспыраапка бигэргитиллибит халыыбыгар байыас дьайыыгы кыттан саҕалаабыт күнэ-дьыла ыйыллыбат, ону тэҥэ, ыспыраапка бэриллибит кэмигэр АБДь-га кытта сылдьарын чахчыта эбэтэр кыттан бүппүт күнүн-дьылын бигэргэтэр иһитиннэрии суруллубат.
Мунньахха ураты ыытыылаах дьыаланы суукка биэрэргэ АБДь кыттыылаахтарын уонна кинилэр дьиэ кэргэттэрин чилиэннэрин госпошлинаны төлүүртэн босхолуур туһунан өссө биир федеральнай таһымҥа көҕүлээһин көрүлүннэ. Чуолаан, байыас аҕа буоларын эбэтэр сураҕа суох сүппүтү өлбүтүнэн билинии эрэйиллэр.
Мунньахха киирбит этиилэр ситэриллиэхтэрэ уонна сотору кэминэн дьүүллэһиигэ киллэриллиэхтэрэ.
Ростовскай уобалас Сокуон таһаарар Мунньаҕын иһитиннэрэр бэлиитикэҕэ управлениетын матырыйаалыттан Ил Түмэн пресс-сулууспата
Хаартыска: А.В. Карбинов
-
1
-
0
-
0
-
0
-
0
-
0
