Көрсүһүүгэ миниистир Артем Александров тыа хаһаайыстыбатын эйгэтигэр тирээн турар соруктар тустарынан иһитиннэрдэ. Өрүс эстэр кэмигэр халаантан сэрэхтээх буолуу дьаһалларын эрдэттэн тэрийэргэ, уу ылар кутталлаах сирдэригэр сүөһүнү-сылгыны быстах хаайар пууннары эрдэттэн бэлэмнииргэ, аһы-үөлү хааччыйарга эттэ. Нам улууһун баһылыгын бастакы солбуйааччы Анатолий Павлов былырыыҥҥы халаан уута 194 эбийиэги ылбытын, 586 сүөһүнү былдьаабытын санатан туран, бастакынан көмөҕө кэлбитин иһин министиэристибэҕэ махталын биллэрдэ.
Салгыы министиэристибэ эппиэттээх үлэһиттэрэ «Тыа сирин территорияларын кэлим сайыннарыы» судаарыстыбаннай бырагыраама саҥа ирдэбиллэрин, сиртэн үүнээйини ылыы, мелиорация салааларыгар уонна каадыр бэлиитикэтигэр туруоруллар соруктар, былааннар тустарынан кэпсээтилэр. Нам улууһун дэлэгээссийэтин чилиэннэрэ Хамаҕаттаҕа хортуоппуйу үүннэриигэ идэтийэр «Жирков А.С.» бааһынай хаһаайыстыбаҕа 1000 туонналаах оҕуруот аһын ыскылаатын, Нам сэл. «Эрэл» кэпэрэтиипкэ саҥа үүт собуотун тутуу, үүт соҕотуопкатын кээмэйин үрдэтии, сааскы ыһыы үлэтигэр бэлэмнэнии уо.д.а. тустарынан санааларын үллэһиннилэр диэн Тыа хаһаайыстыбатын уонна ас-үөл бэлиитикэтин министиэристибэтин пресс-сулууспата иһитиннэрэр.
Хаартыска министиэристибэ саайтыттан ылылынна.
-
0
-
0
-
0
-
0
-
0
-
0
