Уопсастыба

Ол курдук, сылгы иитиитинэн дьарыктанар, дьону-сэргэни көрсөргө, ыччаттары сахалыы олох үөрүйэхтэригэр үөрэтэргэ, такайарга аналлаах саха балаҕанын хаһаайката, Сунтаар Кириэстээҕиттэн төрүттээх Изабелла Степановна-Сыдьаайа, саха таҥаһын бастакынан киэҥ эйгэҕэ тарҕаппыт, Сунтаар маастар-иистэнньэҥэ Светлана Ивановна Петрова үөрэнээччитэ, өрөспүүбүлүкэ иистэнньэҥнэрин “Уран уус” түмсүүтүн салайар, Куокунуттан төрүттээх Антонина Степановна Кириллина айан ырааҕын аахсыбакка Өлөөҥҥө уонна Харыйалаахха күндү ыалдьыт буоллулар.

Култуура киинигэр тэриллибит көрсүһүүгэ кинилэр куобах тириитин таҥастааһын туһунан кэпсээтилэр, 56 устуука куобах тириититтэн тигиллибит суорҕаны көрдөрдүлэр.

Чахчыта даҕаны уһун, тымныы кыһыннаах Саха Сирин төрүт олохтоохторо: сахалар уонна  көс эбэҥкилэр куобах барахсаны бэркэ сыаналыыллара. Кинилэр хас эмит үйэлэр тухары баай хара тыа куобаҕын этин быстыбат аһылык оҥостоллоро, оттон тириитин таҥастааннар, үтүлүктэн, бэргэһэттэн саҕалаан, соҥҥо, суорҕаҥҥа тиийэ тымныыттан харыстыыр араас таҥаһы-сабы тиктэн кэтэллэрэ. Билигин аҕа саастаах дьоннор оҕо эрдэхтэринэ ийэлэрэ уонна эбэлэрэ кыһыҥҥы уһун киэһэлэргэ көмүлүөк оһох иннигэр олорон, куобах тириитин имитэллэрин итиэннэ араас үтүлүгү, бэргэһэни, сэлиэччиги тигэн кэтэрдэллэрин үчүгэйдик өйдүүллэр. Хайдахтаах да бытарҕан тымныыга сылааһынан илгийэр куобах таҥас соҕурууттан аҕалыллар баабырыкаҕа тигиллибит таҥас-сап маҕаһыыҥҥа дэлэччи атыыланар буолуоҕуттан,  умнулла быһыытыйбыта.    

Сунтаар Далбар хотуттара кэпсээбиттэринэн, бу суорҕаҥҥа анаан,  араас улуустар иистэнньэҥнэрэ куобах уорҕатынан А-4 кумааҕы саҕа лоскуйдары сиитэс таҥаска сирийэн тикпиттэр. Олору кулун тутар 5 күнүгэр Дьокуускайга ыытыллыбыт “Якутия мастеровая” быыстапкаҕа түмсэн олорон, холбоон, суорҕан оҥорон таһаарбыттар. Онон бу суорҕан өрөспүүбүлүкэ иистэнньэҥнэрин сомоҕолоһуутун бэлиэтэ буолан, улуустарынан көрдөрүүгэ сылдьар эбит. Элбэх ыал ийэлэрэ, эбэлэрэ имигэс, талааннаах тарбахтарынан тикпит сылаас суорҕаннара сырдыкка тардыһыы, өбүгэлэрбит үөрүйэхтэрин  сөргүтүү, иккистээн тыыннааһын, Анал байыаннай дьайыыга сылдьар буойуннар этэҥҥэ буолалларыгар алгыс, Сомоҕолоһуу бэлиэтэ буолан ыраах хоту Өлөөҥҥө тиийэн кэлбитин имэрийэн-томоруйан, илэ харахпытынан көрөн, сылаас санаабытын иҥэрдибит.

Ыалдьыттарбытын Өлөөн эбэ хотун уҥа салаатыгар, үрдүккэ харбаһар хайалардаах, кыыл таба кыырайар алыылардаах, тайах таалар арыылардаах Арҕаа салаатыгар сырытыннардыбыт. Алгыстаах айаннарын аартыгын тутан биэрдибит. Изабелла Степановна, Антонина Степановна сырыылара табыллан, суоллара тыргылла турда.

Бараары туран, Өлөөн ыалдьытымсах дьонугар-сэргэтигэр барҕа махталларын тиэртилэр: “Сайда-үүнэ туруҥ, ыччат дьоҥҥут төрөөбүт төрүт дойдуларыгар олохсуйдуннар, уйгуну-быйаны уһанныннар!" -- диэн Сунтаардыы махтаннылар, сахалыы алгыс бастыҥын эттилэр.

Надежда КОЛОДЕЗНИКОВА,  Өлөөн, Харыйалаах бөһүөлэгэ.

Хаартыскалары ааптар хааччыйда.