Тустаах иитэр-үөрэтэр үлэтигэр дьүөрэлээн, агрооскуола сылгы иитиитинэн уонна оҕуруот аһын үүннэриинэн дьарыктанар. Уһун, тымныы кыһыннаах, кылгас сайыннаах, эрдэ хаһыҥныыр хотугу сиргэ араас оҕуруот аһын үүннэриигэ уопут оҥорор. Манна 11 кылаас-кэмпилиэгинэн 66 оҕо үөрэнэр, 25 учуутал үлэлиир-хамсыыр. Былырыыҥҥыттан кус-хаас иитиитин саҕалаата. Иитэр-үөрэтэр үлэһиттэринэн хааччыллыыта, материальнай-тиэхиньиичэскэй баазата аныгы ирдэбилгэ эппиэттиир.
Арыылаах агрооскуолатын баазатыгар ааспыт нэдиэлэҕэ биир сэргэх тэрээһин буолан ааста. Ол туһунан дириэктэр Валентина Павлова маннык кэпсиир:
-- 2007 сылтан үлэлиир «Айылгы» этнопедагогика киинин көҕүлээһининэн, биһиги оскуолабытгар өрөспүүбүлүкэ таһымнаах II Этнопедагогическай ааҕыылар ыытылыннылар. Тэрийээччилэринэн Дьааҥы улууһун үөрэҕин салалтата, Арыылаах агрооскуола уонна Үөһээ Бүлүү улууһун Ороһутааҕы К.С. Чиряев аатынан норуот педагогикатын киинэ буолаллар.
Бу тэрээһин Арассыыйаҕа Аҕа дойдуну көмүскээччи, Саха Өрөспүүбулукэтигэр Ийэ дойдуну көмүскээччи, Дьааҥы улууһугар Патриотизм уонна гражданскай эппиэтинэс сылларыгар, Улуу Кыайыы 80 сылыгар ананна. Ааҕыыларга Дьааҥы улууһун бэрэстэбиитэллэрин таһынан, онлайн киэбинэн Амма, Горнай, Кэбээйи, Нам, Өлүөхүмэ, Уус Алдан, Үөһээ Халыма, Таатта, Томпо, Эбээн Бытантай улуустарыттан уонна Дьокуускайтан педагогтар, учууталлар, уһуйаан иитээччилэрэ, араас тэрилтэлэр үлэһиттэрэ, устудьуоннар, барыта 92 киһи кытынна.
Онон Ааҕыылар кыттыылаахтара араас дириҥ ис хоһоонноох дакылааттары иһиттилэр. Сиэксийэлэринэн хайдыһан, дьиэ кэргэн сыаннастарын, иитэр-үөрэтэр үлэ, уол оҕону патриот быһыытынан иитии, норуот педагогиката уона түмэллэр патриотическай иитиигэ оруолларын, уол оҕону айылҕаҕа, итэҕэлгэ сыһыаран иитии, экологическай үлэ, төрүччү, үйэтитии, кылаас таһынааҕы үлэ иитиигэ оруолун үрдэтэр уо.д.а. туһунан киэҥ кэпсэтии таҕыста.
Икки саҥа кинигэ: “Айылгы” киин 20 сыллаах үлэтин-хамнаһын туһунан сыдатар «Этнопедагогические практики в условиях Арктической зоны Республики Саха» уонна Арыылаах агрошколатын 10 сыллаах үлэтин-хамнаһын туһунан «Арктическая школа как основа воспитания хозяина земли» кинигэлэр сүрэхтэннилэр. Араас быыстапкалар үлэлээтилэр. Ону таһынан, үөрэх үлэһиттэрин агитбиригээдэлэрин улуустааҕы бастакы бэстибээллэрэ буолла.
Хаартыскалары Валентина Павлова хааччыйда
-
6
-
0
-
0
-
0
-
0
-
0
