«Ильмень үрдүнэн туруйалар» мемориал комплекс Хотугулуу-Арҕааҥҥы фронт 27-с армиятын 19-с хайыһар туспа биригээдэтин байыастарыгар, 1943 с. олунньу 23 күнүгэр Новгород уобалаһын Старай Русса оройуонун босхолооһуҥҥа дьоруойдуу кыргыспыт, олохторун толук уурбут буойуттарга ананар. Биригээдэ сүрүн күүһэ Саха сириттэн 1942 с. сайыныгар ыҥырыллан тиийбит биһиги биир дойдулаахтарбыт этилэр. Ол түүн кинилэр өстөөх күүстээх уотун аннынан кимэн киирэн, Ильмень күөлү туораан, күөл соҕурууҥҥу кытылыгар оборуоналаммыттара. Бу кыргыһыыга 19-с хайыһар туспа биригээдэтиттэн 600 байыас Ийэ дойдутун туһугар олохторун толук уурбуттара, ол иһин бу кыргыһыы саха дьонугар суолтата улахан.
Норуот дьокутааттара Ийэ дойду көмүскэлигэр кылаастарын киллэрбит дьоҥҥо махтал тылларын анаатылар, кинилэр сырдык кэриэстэригэр сүгүрүйдүлэр. Улуу Кыайыы 80 сылын көрсө ыытыллыбыт бу ытык дьаһалга түөлбэ олохтоохторо, үлэ бэтэрээннэрэ уонна оскуола үөрэнээччилэрэ, эдэр ыччаттар кыттыыны ылбыттара дойдубут ааспыт историятын үөрэтии, биһиги дьоллоох олохпут туһугар саа-садах тутан сэриилэспит, олохторун толук уурбут уонна Кыайыы көтөллөнөн эргиллэн кэлэн, эйэлээх олоҕу тутуспут аҕа көлүөнэни билиҥҥи ыччат өйдүүрүн-сыаналыырын туһунан кэрэһилээтэ.
Ыспыраапка. «Ильмень үрдүнэн туруйалар» мемориал комплекс күөрэлэммит мууһу санатар үс таас билиитэлэртэн турар, ол билиитэлэргэ өлбүт саха буойуттарын ааттара-суолара суруллубут. Ону таһынан саллаат пааматынньыга уонна Кыһыл сулус үрдүнэн көтөн эрэр сэттэ туруйа ойууламмыт диэн Ил Түмэн пресс-сулууспата суруйар.
Хаартыска Ил Түмэн саайтыттан
-
1
-
0
-
0
-
0
-
0
-
0
