Уопсастыба

Анал байыаннай дьайыыга сылдьар буойуттарга көмөнү тэрийэр үлэ тохтообот. Бүттүүн Саха сирин олохтоохторо бу көмөҕө туох кыалларынан илиибитин уунабыт. Манна улахан хамсааһыннары оҥорор, биир өрөбүлэ суох үлэлиир, аҥардас сүрэх ыйыытынан, санаа күүһүнэн, анал байыаннай дьайыыга сылдьар биир дойдулаахтарбытыгар таҥаһы  тигэр сыахтарга күүстээх үлэ ыытыллар. Өрөспүүбүлүкэ дьонун-сэргэтин хамнатыы элбэх сыраттан, үлэттэн тахсара өйдөнөр.

Оннук хамсааһыны, “Илии сылааһа” иистэнэр сыах салайааччыта Ирина Саввина ыытар. Улуустарга тэриллибит иис сыахтара сыыйа киниэхэ холбоһон, үлэ сүнньэ кэҥээн, кыаҕырар барбыта. Таатта улууһугар “Харыстаана” иис сыаҕын Саха Өрөспүүбүлүкэтин үөрэҕириитин туйгуна, Учууталлар учууталлара, Таатта улууһун социальнай сайдыытыгар кылаатын иһин үһүс истиэпэннээх бэлиэлээх, идэтигэр бэриниилээх Анна Никифорова салайар. Ол туһунан маннык кэпсиир:

--АБДь саҕаланарын кытта, үлэлиир оскуолам, сахалартан соҕотох “Албан Аат” уордьан толору кавалера Д.А.Петров аатын сүгэр оскуола дириэктэрэ Дмитрий Вячеславович Сергеев мастарыскыайы көҥүллээн, иистэнэн саҕалаабыппыт. Бастаан утаа иистэнэр массыыналарбытын дьиэбититтэн таспыппыт. Билигин Таатта нэһилиэгин дьаһалтатыгар анал хостоохпут. Тоҕус ийэ бэйэ-бэйэбитин ситэрсэн, алгыс тылынан, илиибит сылааһынан уолаттарбытыгар иистэнэ олоробут. Учуутал бары идэни биэрэр дииллэрэ мээнэ буолбатах, олоххо тутаах идэ буолар, ол туоһутунан   иистэнньэҥнэрим  80 %-нара учуутал, иитээччи идэлээхтэр. Бэйэм 1987 сылтан учууталлыыбын, Александра Бочурова алын кылаастарга уруһуй учуутала, Марианна Дмитриевна идэтинэн нуучча тылын учуутала, педагог-библиотекарь, Валентина Собакина Тааттатааҕы лиссиэй интэринээтин иитээччитэ, Саргылана Слепцова иитээччи идэлээх, “Доҕордоһуу” норуодунай ансаамбыл көстүүмнэргэ худуоһунньуга, Светлана Мессеева Тааттатааҕы лиссиэй интэринээтин иитээччитэ, Аграфена Баишева улуус дьаһалтатын МАУ “Дирекция сельских инициатив” сүрүннүүр исписэлииһэ  уонна тумус туттар дьоммут, үлэ бэтэрээннэрэ, РФ нэһилиэнньэни өҥөнөн хааччыйыы эргиэнин туйгуннара  Анастасия Оросина, Галина Дедюкина биир улахан иллээх кэргэн буоламмыт үлэлиибит.​

Ааспыт сыл балаҕан ыйыгар Иван Бочонин салайааччылаах “Тааттаавтодор” АО Новосибирскай куораттан барыта 367125,04 солкуобай сыаналаах биэс иистэнэр массыынаны, байыаннай таҥаска сөптөөх матырыйааллары аҕалан көмөлөспүтэ. Онон анал иистэнэр, сииктиир  массыыналаахпыт. Эбиитин таһаҕас тиэллэн кэлиитин бэйэлэрэ уйуммуттара. Иистэнэргэ флис, х/б, кулирка таҥас арааһынан,  замогунан хааччыйбыттара.

Маастарыстыбаны үрдэтэргэ "Илии сылааһа" иистэнэр сыах тэрийбит күрэхтэригэр мэлдьи кыттабыт. Ол курдук,  2023 с. бэс ыйын 27-28 күннэригэр Дьохсоҕон нэһилиэгин ыҥырыытынан, өрөспүүбүлүкэтээҕи “Үлэ-иис ыһыаҕа” диэн АБДь кыттыылаахтарыгар байыаннай таҥаһы тигии бастакы өрөспүүбүлүкэтээҕи күрэхтэһиигэ иккис миэстэни ылбыппыт. Балаҕан ыйын 15-16 күннэригэр “Илии сылааһа” өрөспүүбүлүкэтээҕи иккис кэтэхтэн күрэхтэһиигэ, былырыын тохсунньу 30 -- олунньу 2 күннэригэр  өрөспүүбүлүкэтээҕи бастакы күрэхтэһии бастакы улуустааҕы түһүмэҕэр, олунньу 16-17 күннэригэр өрөспүүбүлүкэтээҕи кэтэхтэн күрэхтэһиигэ, от ыйын 8-11 күннэригэр Дьокуускайга тэриллибит өрөспүүбүлүкэтээҕи төрдүс күрэхтэһиигэ кыттыыны ылан, бириистээх миэстэлэри ылан турабыт.

​Бу курдук биир санаанан Кыайыы туһа диэн бэйэлэрин кылааттарын киллэрэр дьоммутунан киэн туттабыт, холобур оҥостобут!