Улуустарынан көрдөххө, ордук элбэх сайылык Амма, Уус Алдан, Мэҥэ Хаҥалас, Хаҥалас, Чурапчы, Таатта, Сунтаар, Бүлүү, Нам улуустарыгар, хотугулартан Дьааҥыга баар эбиттэр. Оттон бас билии киэбинэн ыллахха, тыа хаһаайыстыбатын кэпэрэтиибин, агрофирма, хааччахтаммыт эппиэтинэстэх уопсастыба курдук тэрээһиннээх хаһаайыстыбалар 100 %-нара, бааһынай хаһаайыстыбалар уонна биирдэм урбаанньыттар 32 %-нара, кэтэх ыаллар 0,8 %-нара сайылыктаахтар.
Ыанньык сайылыктарыттан 255 сайылык толору мэхэньисээссийэлээхтэр. 252 сайылык ЛЭП ситиминэн, 46 сайылык диисэлинэн, 3 сайылык күн уотунан үлэлиир батарыайаны, 5 сайылык бэнсиининэн үлэлиир моногенераторы туһаналлар, 3 сайылык электроуота суох. Дьэ бу сайылыктарга быйыл 35 040 ынах сүөһү (өрөспүүбүлүкэ үрдүнэн баар ынах сүөһү 19 %-а), ол иһигэр 17 067 ыанар ынах (өрөспүүбүлүкэ үрдүнэн баар ыанар ынах 25 %-а) сайылыкка таһаарыллыахтаах. Олорго барыта 1 546 киһи, ол иһигэр 663 ыанньыксыт, 140 үүтү тутар учуотчук, 131 тиэхиньик-осеменатор, 313 ньирэй көрөөччү, 299 бостуук үлэлиэхтээх.
Өрүс сүнньүгэр сытар нэһилиэктэр хаһаайыстыбалара сайылыктарга уу ааһар кэмин иннигэр тахсыбыттара. «Саха сүөһүтэ» генопуонда хаһыанай тэрилтэтин улуустардааҕы салаалара сүөһүлэрин сайылыкка Кыайыы күнүн кэнниттэн көһөрбүттэрэ. Оттон атын хаһаайыстыбалар сүрүннээн бу нэдиэлэҕэ таҕыстылар.
-- Биһиги барыта 300-чэкэ сүөһүнү кыстаттыбыт, төрүөх этэҥҥэ буолла. Ыам ыйын 16 күнүгэр 130 ыанар ынаҕы уонна 123 ньирэйи Дириҥ Атахха таһаардыбыт. Сайылыкпытын былырыын саҥардыбыппыт. Билигин күҥҥэ биир туонна үүт ыанар, үс ыанньыксыт, үс ньирэй көрөөччү уонна икки бостуук үлэлиир. Аҕыйах хонуктааҕыта ардаабыта, онон мэччирэҥ син көбөөн эрэр, -- диэн үөрэ-көтө кэпсээтэ Чурапчы улууһун Одьулуун нэһилиэгиттэн «Комплекс» бааһынай хаһаайыстыба салайааччыта Иван Парфенов.
Хаартысканы Иван Парфенов ыытта.
-
2
-
0
-
0
-
0
-
0
-
0
