Уопсастыба

«Үрүмэччи» бөлөххө биһиги дьиэ кэргэн кыра оҕобут иккис сылын иитиллэр. Манна 38 оҕо сылдьар. Оҕом күн аайы уһуйааныгар үөрэ-көтө кэлэриттэн да кэтээн көрдөххө, бөлөхпүт иһигэр сып-сылаас ийэлии сыһыан, эдьиийдии элэккэй алтыһыы, хас биирдии оҕоҕо ураты болҕомто, оҕону умсугутар эйгэ олохсуйбута көстөр. Кырачааннарбыт иитээччилэрин наһаа истиҥник, чугастык «эдьиий» диэн ыҥыраларын да истэргэ минньигэс.

Бөлөхпүт иитээччилэрэ Саргылана Борисовна Потапова, Ньургуйаана Васильевна Степанова оҕону сайыннарар, иитэр-үөрэтэр, аралдьытар ураты ньымалаахтар, уопуттаахтар. Хас биирдии оҕоҕо туспа сыһыаны табан ситиһиилээхтик үлэлииллэр диэн бары төрөппүттэр ааттарыттан бэлиэтиэхпин баҕарабын. Иитээчилэр уҥа илиилэрэ - Сайаана Михайловна Васильева - наһаа истиҥ, наҕыл майгылаах, кини аттыгар куруутун уоскулаҥ, ып-ыраас эйгэ илгийэргэ дылы.

Иитээччилэрбит сыл устатыгар бөлөхпүтүгэр үгүс тэрээһиннэри көҕүлээн ыыталлар, оҕолору араас таһымнаах күрэхтэргэ, куонкурустарга кытыннараллар. Бары төрөппүттэри үлэлэрин тула түмэ тарданнар, оҕолорго үгүс үөрүүлээх умнуллубат түгэннэри бэлэхтииллэр. Манна төрөппүттэр, Дария Николаевна Иванова салалтатынан, түөрт бөлөҕүнэн арахсан сүрдээх тэтимнээхтик, ситиһиилээхтик үлэлэһэллэр. Саҥа дьыл, ыһыах, ийэлэр, аҕалар, уолаттар, кыргаттар күннэрин курдук күүтүүлээх бырааһынньыктарбыт  олус интэриэһинэйдик, көхтөөхтүк бараллар.  

Бу үөрэх дьылыгар оҕолорбут биирдиилээн даҕаны, бөлөҕүнэн даҕаны өрөспүүбүлүкэ, куорат таһымнаах күрэхтэргэ, куонкурустарга ситиһиилэрэ үгүс. Онтон улаханнарын бэлиэтээн этэххэ, «Үрүмэччи» ырыа ансамбыла «Белый снег» диэн ырыаны ыллаан Аан дойдутааҕы «Northern lights» бэстибээл-куонкуруска I-кы истиэпэннээх лауреат, итиэннэ бөлөх хора «Уолаттар ырыалара» диэн ырыанан Бүтүн Арассыыйатааҕы «Вселенная Кындыкан» куонкуруска I-кы ист. дипломант буоллулар.

Маны сэргэ, биирдиилээн оҕолор ситиһиилэрэ эмиэ элбэх. Ол курдук, оҕолорбут Өрөспүүбүлүкэтээҕи «Синичкин день», «По страницам детских книг» уруһуй көрүүтүн күрэҕэр I-кы ист. лауреат, «ДеТвора – детство, творчество, развитие» күрэххэ III ист. лауреат, куорат иһинэн ыытыллыбыт «Сундучок семейных ценностей» I-кы миэстэ буолбуттара. Уһуйааммыт иһинэн ыытыллар тэрээһиннэргэ ситиһиилэрбит, кыайыыларбыт-хотууларбыт үгүстэр.

Истиҥ иитээччилэрбитигэр Саргылана Борисовнаҕа, Ньургуйана Васильевнаҕа, Сайаана Михайловнаҕа үтүө кыһамньыгыт, кытаанах тулуургут, истиҥ сыһыаҥҥыт иһин махтал, таптал тылларын аныыбыт. Күннээх халлаан, иллээх-эйэлээх олох, дьол-соргу арыаллаатын, доруобай чэгиэн буолуҥ диэн алгыспытын аныыбыт!

Эһиил өссө чороччу улаатан, бөлөхпүтүн, эдьиийдэрбитин, доҕотторбутун ахтан уһуйааммытыгар үөрэ-көтө кэлиэхпит!

Екатерина Фрументьевна Сафронова

Хаартыскалара төрөппүт архыыбыттан