Киин ититиниигэ холбоммут, толору хааччыллыылаах дьиэ-уот аныгы олох ирдэбилэ буолар. Биһиги өрөспүүбүлүкэтин салалтата, дойдубут хас биирдии олохтооҕо уйгулаах олохтонорун туһугар кыһамньытын уонна болҕомтотун ууран, сыл аайы араас дьаһаллары ыытар. Олортон биирдэстэринэн, бэйэни салайынан олорор түөлбэлэр икки ардыларыгар ыытыллар грант куонкуруһа буолар.
Куонкуруска Таатта улууһа ситиһиилээхтик кыттан Ил Дархан гранын ылбыта. Онтон улуустааҕы куонкуруска Орто Амма нэһилиэгин Д.Е. Соломонова салайааччылаах «Теплица» бэйэни салайынан олорор түөлбэ «Дьиэ-кэргэҥҥэ - сылааһы» диэн бырайыага кыайыылаах буолбута.
«Теплица» түөлбэҕэ, Орто Амма нэһилиэгин кытыы учаастагар, сүүрбэччэ ыал дьиэ-уот туттан олоробут. Биһиги, киин хочуолунайтан ититэр ситим кыайан тардыллыбат буолан, баччааҥҥа диэри оһох оттор кыһалҕатын көрсөбүт. Уонча сыл олохтоохтор туруорсаннар, кыһалҕаны туһааннаах министиэристибэлэр, СӨ Бырабыыталыстыбата көрбүтэ-истибитэ уонна туспа хочуолуонай тутуутун былааҥҥа киллэрбиттэрэ. Саҕалааһын үлэлэр ыытыллан, кэлэр сылга түөлбэбитигэр ититии киирэриттэн олус үөрэн олоробут.
Бу бырайыакпыт сүнньүнэн ититии систиэмэтин тардыыга турба атыылаһарга түөлбэбитигэр олорор элбэх оҕолоох ыалларбытыгар, аҕам саастаах дьоммутугар, Анал байыаннай дьайыы кыттыылаахтарыгар, инбэлиит оҕолоох уонна соҕотох ийэлэрбитигэр көмө оҥордубут. Манна өрөспүүбүлүкэ бүддьүөтүттэн 477 000 солкуобай көрүллэн, «Металлторг» тэрилтэни кытта дуогабардаһан турба атыыластыбыт. Турбабытын түөлбэбит урбаанньыта Альберт Елисеевич Васильев тиэйэн аҕалан, дьаарыстаан биэрдэ.
Б курдук, олус наадалаах «Дьиэ кэргэҥҥэ – сылааһы» диэн бырайыакпыт сүрүн үлэтин 2024 сыл, Дьиэ-кэргэн сылыгар ситиһиилээхтик оҥордубут. Бырайыакпыт сүнньүнэн олохтоохтору уопсастыбаннай үлэҕэ көҕүлүүр, чөл олоххо тардар араас тэрээһиннэр, күрэхтэһии ыытыллыбыта.
Тыйыс тымныы кыһыннаах дойду олохтоохторо, саамай баҕарар баҕабыт туолан, бэлэм сылаас дьиэҕэ олорон, бар-дьон туһугар үлэлиир-хамсыыр, кыһалҕата суох оҕолорбутун иитэр, сиэннэрбитин көрсөр-харайсар, сөбүлүүр дьарыкпытынан дьарыктанар кэммит кэлиэ, хочуолунайбыт тутуллан өрөгөйдөөх аһыллыытыгар үөрүөхпүт-көтүөхпүт диэн олус эрэнэбит. Ил Дархан грант олохтоон, куонкурустары ыытан, түөлбэлэр сайдыыларыгар кыах биэрэр, төһүү күүс буолар.
Светлана Винокурова, «Теплица» ТОС олохтооҕо,
Хаартыска ааптар архыыбыттан
-
0
-
0
-
0
-
0
-
0
-
0
