Уопсастыба

Өлүөхүмэҕэ ыһыы үлэтэ хайдах баран иһэрин туһунан улуус сүрүн агронома Сардаана Никитина маннык кэпсиир:

– Биһиги быйыл бурдугу 487 гектарга ыһар былааннаахпыт. Ол иһигэр, «Поиск» тыа хаһаайыстыбатын чинчийэр тэрилтэтэ 350 гектарга, судаарыстыбаннай сортобуой учаастак 37 гектарга, бааһынай хаһаайыстыбалар 100 гектарга ыһаллар. Сүөһү сиир култуурата 1116,9 гектарга ыһыллыахтаах, ол иһигэр, биир сыллаах от 908 гектарга, элбэх сыллаах от 208 гектарга. Маны таһынан, хортуоппуй 696 гектарга, ол иһигэр, тыа хаһаайыстыбатын кэпэрэтиибэ 30 гектарга, бааһынай хаһаайыстыбалар 122 гектарга олордоллор. Оҕуруот аһа 37,6 гектарга, ол иһигэр, бааһынай хаһаайыстыбалар 2,97 гектарга, көмөлтө хаһаайыстыбалар 0,54 гектарга, чааһынай ыаллар 34 гектарга олордоллор.

Кыһын бааһыналарга 1837 туонна органическай уоҕурдуу (балбаах), 23 туонна минеральнай уоҕурдуу киллэриллибитэ, 318 гектар бааһынаҕа хаар типтэриллибитэ. Саас 511 гектар бааһынаҕа сиик саптарыллыбыта.

Бэс ыйын 2 күнүнээҕи туругунан, сэлиэһинэй бурдугу «Поиск» 70 гектарга ыста. Сүөһү сиир култуурата 275 гектарга ыһылынна, ол иһигэр биир сыллаах от -- 172 гектарга (саамай элбэх сүөһүлээх «Өлүөхүмэ кыладабыайа» хааччахтаммыт эппиэтинэстээх тэрилтэ 140 гектарга эбиэһи, Судан отун, виканы, В.В. Торговкин бааһынай хаһаайыстыбата 20 гектарга эбиэһи, М.Д. Терентьева бааһынай хаһайыстыбата 12 гектарга эбиһи кытары виканы ыстылар). Маны таһынан, 103 гектарга ааспыт өттүгэр ыһыллыбыт элбэх сыллаах оппут баар («Өлүөхүмэ кыладабыайыгар» 60 гектар, Н.В. Коротких бааһынай хаһаайыстыбатыгар 10 гектар, Н.А. Ефимов бааһынай хаһаайыстыбатыгар 28 гектар, Ю.Н. Охлопков биирдэм тэрилтэтигэр 5 гектар).

Хортуоппуй 248 гектарга олордулунна (былаан 35 %-а), ол иһигэр, ТХПК 9 гектарга, бааһынай хаһаайыстыбалар 50 гектарга олортулар. Оҕуруот аһа 17 гектарга (былаан 46 %-а) олордулунна: хаппыыста 0,5 гектарга, моркуоп 6 гектарга, сүбүөкүлэ 3 гектарга, атын култууралар 7 гектарга. Оҕурсу, помидор уо.д.а. 2656 кв. м иэннээх тэпилииссэлэргэ олордуллар. Ардах түһэн, тэтиммит кыратык бытаарда эрээри, кыраапыкпытын син тутуһан иһэбит. Бааһыналарга ыһыы үлэтэ, тэпилииссэлэргэ оҕуруоту олордуу үлэ көхтөөхтүк ыытыллар.

Бу күннэргэ «Россельхозкиин» федеральнай судаарыстыбаннай бүддьүөт тэрилтэтин Өлүөхүмэтэҕи салаатын үлэһиттэрэ сүрүн агроном Светлана Фоминых салалтатынан аһыҥа баарын-суоҕун бэрэбиэркэлиир үлэни ыыттылар. Барыта 1665 гектар бааһына сирин чинчэннэр, биир кубическай миэтэрэ сиргэ ортотунан үстүү аһыҥа баарын быһаардылар.

Хаартыскалары Сардаана Никитина ыытта.