Мэҥэ Хаҥалас улууһа бурдугу 1 598 гектар, сүөһү сиир култууратын 3 138 гектар бааһынаҕа ыһар былааннаах. Улуус биир бөдөҥ хаһаайыстыбата «Тумул» кэпэрэтиип (салайааччы Таисия Десяткина) барыта 623 гектарга үлэлиир, итинтэн 503 гектарга бурдугу (120 гектарга сэлиэһинэйи, 209 гектарга эбиэһи, 89 гектарга ньэчимиэни) итиэннэ 120 гектарга эбиэһи күөхтүү хомуйарга анаан ыһар.
Хаҥалас улууһа бурдугу 2139 гектарга, сүөһү сиир култууратын 3615 гектарга ыһар. Ол иһигэр, 1000 ынах сүөһүлээх, биир оччо сылгылаах «Бөртө сылгы собуота» хааччахтаммыт эппиэтинэстээх тэрилтэ (салайааччы Александр Павлов) 700 гектарга сүөһү сиир култууратын ыһар.
Оттон «Туймаада» агрохолдинг иһинэн тэриллэн үлэлиир «Туймаада экэпиэрмэ» хааччахтаммыт эппиэтинэстээх тэрилтэ (салайааччы Егор Егоров) үс салаанан холбоон, 780 гектарга сүөһү сиир култууратын ыһар соруктаах.
– Ыһыы сиэмэтин уонна уоҕурдууну сайаапка быһыытынан үрдүкү тэрилтэбит, «Туймаада» агрохолдинг, хааччыйда. Биһиги, Нөмүгүтээҕи салаа, 390 гектарга үлэлиибит. Эбиэһи 30 гектарга ыстыбыт, уҥуор баар бааһынабытыгар тахсыахтаах этибит да, өрүскэ уу кэлэн, хаайан кэбистэ. Ону таһынан Моойдоох учаастагар подсолнечнигы уонна Судан отун ыһыахпыт. Быйыл дьыл эрдэ кэллэ, эбэ халааннаабата, онон сииги саптаран, ыһыыны арыый эрдэ саҕалаабыппыт. Бу билигин ардах кэлэ-кэлэ түһэ турар, астарын кэтэһэ-кэтэһэ ыһа сылдьабыт. Сүүрбэччэ хонук саппаастаахпыт, онон соччо куттаммаппыт, – диир хаһаайыстыба агронома Владимир Трофимов.
Моойдоох бааһыната 100 гектар иэннээх. Манна 2017 сыллаахха омук сириттэн Reinke диэн нүөлсүтэр ситими аҕалан туруорбуттара. Көмпүүтэринэн салаллар, бааһынаҕа хаама сылдьан ууну ыстарар ситим хас да сыл бэркэ үлэлээн үөрдэн баран, «хаампат» буолан хаалбыта. Сааҥсыйанан сибээстээн саппаас чааһы аҕалар кыаллыбакка, хас да сыл турбута. «Туймаада» агрохолдинт салалтатын (генеральнай дириэктэр Петр Ефремов) кэпсэтиитинэн, Воронеж куоракка баар, тыа хаһаайыстыбатын тиэхиньикэтигэр идэтийэр Koblik Group диэн хампаанньа ону өрөмүөннүүргэ ылсан, бэйэтин собуотугар саҥа саппаас чаастары оҥорон, исписэлиистэрин ыытан, ситим саамай бөдөҥ, 435 миэтэрэ усталаах, 180 кыраадыһынан эргийэр түһүмэҕэ быйыл оҥоһуллубут. Аны 350 уонна 320 диаметрдаах икки түһүмэх оҥоһуллуохтаах. Нүөлсүтэр ситим сөргүтүллэн, толору күүһүнэн үлэлиирин нөмүгүлэр эрэнэ кэтэһэллэр. Үлэ дьонун баҕа санаата туолуохтун.
-
0
-
0
-
0
-
0
-
0
-
0
