Улуус күөн туттар бөдөҥ хаһаайыстыбата, «Амматааҕы» аахсыйалаах уопсастыба, сиэмэ хаһаайыстыбатын быһыытынан, 2017 сыллаахха «Амматааҕы» кэпэрэтиип базатыгар тэриллибитэ. Саха сирин тыйыс усулуобуйатыгар таһаарыллыбыт, оройуоннаммыт сэлиэһинэй «Туймаада», ньэчимиэн «Тамми» уонна эбиэс «Виленскэй» суортарын элбэтиигэ утумнаахтык үлэлиир. Ол түмүгэр, ыһыы сиэмэтинэн бэйэтин толору хааччыммытын таһынан, атын хаһаайыстыбалары эмиэ хааччыйар. Онон аммалар улуус таһыттан сиэмэни атыыласпатахтара хас да сыл буолла.
Уус Алдан улууһа 3 138 гектар бааһынаҕа үлэлиир. Ол туһунан улуус сүрүн агронома Прокопий Белолюбскай маннык кэпсиир:
– Туорахтаах култуураҕа, ол эбэтэр бурдукка, идэтийэр үс хаһаайыстыбабыт холбоон 1 399 гектарга үлэлииллэр. «Биэттэ-Агро» хааччахтаммыт эппиэтинэстээх тэрилтэ (салайааччы Василий Сивцев) 145 гектарга сэлиэһинэйи, 452 гектарга эбиэһи, 25 гектарга оруоһу, Дмитрий Илларионов бааһынай хаһаайыстыбата 134 гектарга сэлиэһинэйи, 342 гектарга эбиэһи, «Саһылыкаан» кэпэрэтиип 55 гектарга сэлиэһинэйи, 244 гектарга эбиэһи ыһаллар. Бэйэбит үүннэрбит сиэмэбитинэн 100 % хааччынан олоробут. Бу сиэмэ хаһаайыстыбатын быһыытынан үлэлиир «Биэттэ-Агро» ХЭТ уонна Дмитрий Илларионов бааһынай хаһаайыстыбатын өр сыллаах сыралаах үлэлэрин түмүгэ буолар. Кинилэр сэлиэһинэй «Туймаада РС1», «Приленскай 19 РС» уонна эбиэс «Виленскай РС1» суортарын элбэтэн, атын нэһилиэктэр хаһаайыстыбаларын хааччыйаллар. Ону таһынан, Чурапчыга 67, Мэҥэ Хаҥаласка 28, Намҥа 16, Үөһээ Бүлүүгэ 22 туонна сиэмэни атыылаатылар.
Кэлэр сылга үрдүк кылаастаах сиэмэнэн хааччынар сыалтан, Сири оҥоруу өрөспүүбүлүкэтээҕи сулууспатын иһинэн үлэлиир «Билим» хааччахтаммыт эппиэтинэстээх тэрилтэттэн 10,4 туонна супер-элита кылаастаах сиэмэни ылан ыстылар. Онон, эһиил бу сиэмэни туһаныахпыт диэн былаанныыбыт. Быйыл дьыл эрдэлээн, бааһынаҕа эрдэ тахсыбыппыт, бөдөҥ хаһаайыстыбаларбыт сүрүннээн ыам ыйын 28-29 күннэригэр бурдук ыһыытын бүтэрдилэр. Билигин сүөһү сиир култууратыгар үлэлии сылдьаллар, биир сыллаах оту 661 гектарга, элбэх сыллаах оту 85 гектарга ыһаллар, онно эбии 754 гектарга былырыын-иллэрээ сыл ыспыт оппут баар. От сиэмэтэ эмиэ бэйэбит үүннэрэн элбэппит олохтоох суортарбыт. Онон сиэмэни тастан ылбатыбыт, арай, 153 туонна минеральнай уоҕурдууну аҕалтаран, хаһаайыстыбаларга тиэрдибиппит.
Амма уонна Уус Алдан улуустарын курдук ыһыы сиэмэтинэн хааччынар улуустар кэккэлэрэ хаҥаан истин.
Хаартыскалары Прокопий Белолюбскай хааччыйда .
-
0
-
0
-
0
-
0
-
0
-
0
