Салгыы даҕаны ол соҕуруу дойдуга оннук олоруо эбитэ буолуо, ону кини дьылҕатын биир эдэр киһи тосту уларыппыта. Эдэр киһи ханна эрэ хоту үлэлиир, уоппускатыгар төрөппүттэригэр кэлэ сылдьар эбит этэ. Ол кыһыны быһа суруйсан баран, сайыныгар кэлэн, Татьянаны сүгүннэрэн илдьэ барбыта.
Дьэ ити курдук, Татьяна Шевченко Сунтаар Устуйатыгар кэлбитэ, кэргэнэ Владимир Хамренко Кэмпэндээйитээҕи эспэдииссийэ прораба этэ. Устуйа Кэмпэндээйкэ үрэх үрдүгэр, бэс чагда быыһыгар турара. Кэрэ айылҕалаах дойду олохтоохторо даҕаны эмиэ кэрэ дууһалаах, бэрт эйэҕэс-сайаҕас, киһиэхэ үтүөнү эрэ баҕарар дьон буолан биэрбиттэрэ. Соҕуруу дойду кыыһа оскуолаҕа учууталынан үлэлээбитэ, тыа сирин оҕолоругар уруһуй ускуустубатын кэрэ эйгэтин арыйбыта. Итиэннэ саамай сүрүнэ – ийэ буолар дьолу билбитэ.
Татьяна бэртээхэй хаһаайка, олус асчыт, ордук бурдук аһы астыырын сөбүлүүр. Кыысчаана кыра эрдэҕинэ, иккиэн тиэстэнэн араас буукубалары уонна сыыппаралары оҥороннор, духуопкаҕа бэчиэнньэ буһараллара. Инньэ гынан, Танечка түөрт саастааҕар буукубаны барытын билбитэ, сүһүөхтээн ааҕар уонна суруйар буолбута. Соҕуруу олорор Эбээ Катятыгар сурук суруйан, хаарга оонньуу сылдьар оҕолору уруһуйдаан ыытара.
Аҕыс сыл биллибэккэ ааспыта. Сойуус ыһыллан, тыа сиригэр тутуу тэрилтэлэрэ ыарахан турукка киирбиттэрэ. Инньэ гынан, 1995 с., кыыстара Танечка 5 саастааҕар, Мирнэйгэ көспүттэрэ. Тутар-таҥар тэрилтэҕэ үлэлии киирбиттэрэ, Владимир Михайлович прорабтаабыта, Татьяна Васильевна худуоһунньук-оформителинэн үлэлээбитэ.
Кэргэнэ 2015 с. өлбүтүн кэнниттэн, Татьяна Васильевна «Горняк» санаторийга үлэлээбитэ. Тустаах үлэтин таһынан, литературнай киэһэлэри тэрийэн ыытара, бэйиэттэр мэтириэттэрин уруһуйдуура. Куорат олохтоохторо ону билигин истиҥник саныыллар.
Устуйаҕа күн сирин көрбүт Танечка орто оскуоланы кыһыл көмүс мэтээлинэн бүтэрэн, Санкт-Петербурга икки үрдүк үөрэххэ тэҥинэн киирэн, бииригэр күнүскүгэ, иккиһигэр кэтэхтэн үөрэммитэ. Үөрэҕин иккиэннэрин «кыһыл» дипломнаах бүтэрбитэ. Таптыыр киһитин көрсөн, ыал буолан онно олохсуйда, билигин «Тари Тур» хампаанньаҕа үлэлиир. Уола Максим үһүс кылааһы бүтэрдэ, эмиэ туйгун үөрэнээччи буолан, эбэтин үөртэ. Кыыһа Таня куруук ыҥырар даҕаны, Татьяна Васильевна дьолун булбут, эрчимнээх эдэр сааһын атаарбыт дойдутуттан арахсыан баҕарбат.
Хаартыскалар: Татьяна Шевченко архыыбыттан.
-
1
-
0
-
0
-
0
-
0
-
0
