Тыа хаһаайыстыбатын уонна ас-үөл бэлиитикэтин министиэристибэтэ иһитиннэрэринэн, дьиэ кэргэнинэн бааһынай хаһаайыстыбаларын сайыннарыы граннарыгар докумуоннары хомуйуу бэс ыйын 17 күнүттэн от ыйын 18 күнүгэр диэри, «Электроннай бүддьүөт» ситиминэн хомуллар. Сыылката: [https://promote.budget.gov.ru](https://promote.budget.gov.ru).
Дьиэ кэргэн пиэрмэтэ диэн аата да этэрин курдук, дьиэ кэргэнинэн бааһынай хаһаайыстыба биитэр биирдэм тэрилтэ буолар. Онуоха хаһаайыстыба тыа сиригэр баар уонна үлэлээбитэ биир сылын туолбут, тыа хаһаайыстыбатын табаарын оҥорон таһаарыыга идэтийэр, онтон дохуот ылар буолуохтаах. Иккиһинэн, бырайыагын, ол эбэтэр былааннаммыт үлэтин, харчытын 30 %-ыттан итэҕэһэ суоҕа баар, ол иһигэр 10 %-а бэйэтин харчыта буолуохтаах.
Грант муҥутуур улахан кээмэйэ 30 мөл солк., бу бырайыак уопсай сууматын 70 %-а. Грант харчыта туһаныллар: тыа хаһаайыстыбатыгар анаммыт сири атыылаһарга, үлэ эбийиэгин туттарга, аныгы тэрилинэн хааччыйарга, тыа хаһаайыстыбатын тиэхиньикэтин, эньиэргийэ тэрилин атыылаһарга биитэр чэпчэтиилээх кирэдиит сорох чааһын сабарга (грант сууматыттан 20 %-ҥа диэри).
Ирдэниллэр: олохтоммут пуорманан толоруллубут сайаапка, бырайыак биисинэс-былаана уонна тустаах докумуоннар (ЕГРН быыпыската, үп-харчы отчуота уо.д.а.).
Ирдэнэр докумуоннар кэрискэлэрэ уонна грант куонкуруһар кыттыы усулуобуйата министиэристибэ саайтыгар баар [https://minsel.sakha.gov.ru](https://minsel.sakha.gov.ru).
Сайаапкалар 10 хайысханан сыаналаналлар. Ол иһигэр, хаһаайыстыба төһө үлэһиттээҕэ, туох эбийиэктээҕэ, хас гектар сирдээҕэ, төһө дохуоту киллэринэрэ, хас үлэ миэстэтин таһаарарга былаанныыра… барыта учуоттанар. Анал байыаннай дьайыы кыттыылаахтарыгар уонна кинилэр дьиэ кэргэттэригэр эбии баал ааҕыллар. Сүүмэрдээһин түмүгэ атырдьах ыйын 5 күнүгэр диэри биллиэҕэ диэн Тыа хаһаайыстыбатын уонна ас-үөл бэлиитикэтин министиэристибэтэ иһитиннэрэр.
Хаартыска: Василий Кононов (Ил Түмэн).
-
1
-
0
-
0
-
0
-
0
-
0
