Күрэс төрүт көрүҥнэригэр XXII-с «Манчаары оонньуулара» ыытыллар кэмигэр 11 араас күрэс көрүҥнэринэн, 6 хайысханан 227 үтүө көмөһүт үлэлиэҕэ. Үтүө көмөһүттэр от ыйын 2-с күнүттэн саҕалаан күрэс төрүт көрүҥнэригэр Оонньуулар устуоруйатын үөрэппиттэр, сирдьит буолар үлэлэрин билсибиттэр, быраактыка ааспыттар. Үтүө көмөһүттэр үлэлэрин Варвара Рахлеева салайар.
Үөрүүлээх тэрээһиҥҥэ Саха Өрөспүүбүлүкэтин Бырабыыталыстыбатын Бэрэссэдээтэлин солбуйааччы, Манчаары оонньууларын тэрийэр кэмитиэтин бэрэссэдээтэлэ Сергей Васильевич Местников иһитиннэрбитинэн, мантан ыла «волонтер» диэн тыл, Сахалыы тиэрмин хамыыһыйатынан бигэргитиллэн, «үтүө көмөһүт» диэн буолар:
-- Биһиги киэҥ-нэлэмэн өрөспүүбүлүкэбит бары улуустарыттан Ытык Күөлгэ тыһыынчанан ыалдьыт кэлэр. Кинилэр быйылгы улахан күрэхтэһиигэ кыттыахтара уонна бэйэлэрин күрэсчиттэригэр ыалдьыахтара. Онон бу күннэргэ Саха Сирин олохтоохторо болҕомтолорун Таатта улууһугар ууруохтара. Үтүө көмөһүттэргэ Манчаары оонньууларын ыытарга баҕа өттүлэринэн кылааттарын киллэрэллэрин иһин махталбытын тиэрдэбит. Үтүө көмөһүттэр - улахан тэрээһиннэр сүрүн тэрийээччилэриттэн биирдэстэрэ, ыалдьыттарбыт бу оонньуулары хайдах ылыналлара, ахталлара эһигиттэн тутулуктаах.
Саха Өрөспүүбүлүкэтин физическэй култуураҕа уонна успуорка миниистирэ Леонид Николаевич Спиридонов эҕэрдэлээтэ:
-- Эһиги Манчаары оонньууларын сирэйэ буолаҕыт. Бастакынан ыалдьыттары көрсөҕүт, күрэсчиттэргэ көмөлөһөҕүт, көрөөччүлэри сирдиигит. Билэргит курдук, Саха Сиригэр үтүө көмөһүттэр кыттыгаһа суох биир да улахан тэрээһин ыытыллыбат. Көҥүл өттүнэн көмөлөһөргө талаһар дьоннордоохпутунан киэн туттуохха эрэ сөп. Бары үтүө көмөһүттэргэ махталбын тиэрдэбин уонна күүһү-уоҕу, чаҕылхай түгэннэри баҕарабын!
«Таатта улууһа» муниципальный оройуон Аҕа баһылыга Айаал Семенович Бурцев бэлиэтээбитинэн, үтүө көмөһүттэр нэдиэлэ устата биир сомоҕо хамаанда буолуохтара. Кинилэр анал үөрэҕи ааспыттар, ыалдьыттары сахалыы уонна нууччалыы эрэ буолбакка, хас да омук тылынан көрсөргө бэлэмнэр.
***
Далааһыннаах тэрээһин хайдах ыытыллара үтүө көмөһүттэртэн быһаччы тутулуктаах. Онон, Оонньуу сирдьит сулустарыгар эппиэтинэстээх үлэлэригэр ситиһиини баҕарабыт!
Антонина НЕУСТРОЕВА
Хаартыскалар: https://t.me/ckmodun
-
0
-
0
-
0
-
0
-
0
-
0
