Бас билии көрүҥүттэн тутулуга суох, бары хаһаайыстыбаларга үүнүү үчүгэй. Саас биир гектар бааһынаттан 10 сэнтиниэр бурдук хомуллуон сөбө барылламмыта эрээри, күннээҕи үлэ быдан атын сыыппаралары көрдөрөр. Билиҥҥи туругунан, бааһына 53 %-а, ол эбэтэр 5 926 гектардаах ыһыы быһыллан, баалабайынан 7 714 туонна бурдук хомулунна. Былырыын баччаларга 3 019 туонна бурдук ылыллыбыта. Билиҥҥитэ хас гектар ахсыттан ортотунан 13 сэнтиниэр үүнүү кэллэ.
– Бурдук хомуура тэтимнээхтик саҕаламмыта биһиги аграрийдарбыт тэрээһиннээх үлэлэрин, күн-дьыл туран биэрбитин итиэннэ аныгы агротехнологиялары туһаныы түмүгэ буолар. Билигин биһиги кыраапыгы урутаан иһэрбитин таһынан, өтөрүнэн ыла илик өлгөм үүнүүбүтүн ылар туруктаах үлэлии-хамсыы сылдьабыт, – диир миниистири солбуйааччы Сахаяна Павлова.
Ордук бурдукка идэтийэн үлэлиир сүрүн улуустар хаһаайыстыбаларын уонна ТХНЧИ бааһыналарын үүнүүлэрэ үөрдэр. Ол курдук, Хаҥалас улууһуттан Евдокия Денисова салайар бааһынай хаһайыстыбата ньэчимиэн «Быйаҥ» суордун ыһан, гектартан 35 сэнтиниэри, Амма улууһа гектар ахсыттан 25,5 сэнтиниэр эбиэһи, Мэҥэ Хаҥалас улууһун «Тумул» кэпэрэтиибэ гектар ахсыттан 31 сэнтиниэр ньэчимиэни быстылар. Уус Алдан улууһун хаһаайыстыбаларын көрдөрүүлэрэ эмиэ бэрт. ТХНЧИ эспиримиэнниир ыһыыларыгар, «Наука» ХЭТ бааһыналарыгар хас биирдии гектартан сэлиэһинэй «Туймаада» суорда 33 сэнтиниэр, эбиэс «Виленскэй» суорда 20 сэнтиниэр, эбиэс «Покровскай» суорда 19 сэнтиниэр быһылынна.
ТХНЧИ учуонайдара таһаарбыт суортара сиртэн үүнээйини ылыыга саҥа саҕахтары арыйаллар. Холобур, ньэчимиэн «Быйаҥ» суорда биир гектартан 69,8 сэнтиниэр үүнүүнү биэрэр кыахтааҕын 2019 сыллаахха Красноярскай кыраайга, эбиэс «Виленскэй» суорда биир гектартан 61,2 сэнтиниэргэ тиийэ үүнэрин 2014 сыллаахха Забайкальеҕа көрдөрбүттэрэ. Бу – бэйэбит учуонайдарбыт айан таһаарбыт суортара тыйыс айылҕалаах Саха Сирин бааһыналарыгар үрдүк үүнүүнү биэрэр кыахтаахтарын көрдөрөр.
Билигин да хомуур түмүктэниэ эрдэ. Сир уустара бааһына барахсан уунан биэрбит быйаҥын сүтүгэ суох хомуйуохтара, үлэлэрин кэмигэр түмүктүөхтэрэ диэн эрэнэбит.
Хаартыска: ТХАҮөБМ саайтыттан.
-
2
-
0
-
0
-
0
-
0
-
0
