Улуус уон нэһилиэгэр баһылыктар талылыннылар. Улууска 11866 быыбардааччы баарыттан ылан көрөр буоллахха маннык:
Таатта нэһилиэгин олохтоохторо 75,19 % куолаһы биэрэн, биир санаанан Егор Павловы баһылыгынан бигэргэттилэр. Уолба нэһилиэгин быыбардааччылара куоластарын 77,89 % Василий Рахлеевка уган баһылык оҥордулар, Хара Алданнар 59 куолаһы биэрэн Софрон Крылову (56, 19 %) таллылар, Тыараһаҕа барыта 467 киһи куоластаата, түмүккэ Святослав Сунхалыровы баһылык оҥордулар. Даайа Амматыттан 99 киһи кыттыбытыттан үс хандьыдааттан 43 куолаһы ылан, олохтоох эдэр киһи Иван Сидоров (44, 33%) баһылык аатын сүктэ. Дьүлэйдэр 51,81 % куолаһы биэрэн, Олег Осиповы баһылыгынан бигэргэттилэр. Оттон Игидэйгэ нэһилиэнньэ 67,23 % быыбарга кытынна, 52, 94 % куолаһы ылан, Егор Марков баһылыгынан бигэргэннэ. Орто Аммалар 51,11 % быыбардаан, Альберт Кулачиковы өссө төгүл таллылар. Уус Амма олохтоохторо Егор Васильевка 56, 36 % уган, о.э 133 куолаһы биэрэн, баһылыктарын хат олортулар. Алданнар холкутук 79,03 % Егор Постников туһатыгар биэрэн, иккистээн олортулар.
Киирсиилээх быыбар үс нэһилиэккэ Тыараһаҕа, Даайа Амматыгар уонна Игидэйгэ барда. Бу үс нэһилиэк быыбардааччылара эрбии тииһинии киирсэн, быыбар барыытын сытыырхаттылар. Ол эрээри, Тыараһалар дьиҥнээх киирсиини көрдөрдүлэр, икки турбут хандьыдаат куолаһа тэҥнэһэн (232 куолас), ТИК быһаарыытынан ким эрдэ сайаапка түһэрбитинэн быһаарыллан, Святослав Сунхалыров баһылыгынан талылынна.
Октябрьскай, Тыараһа, Даайа Амматын нэһилиэктэриттэн улуус дьокутаатынан Сергей Дорофеев, 10-с уокурукка Улахан Сайылыктан Гаврил Кычкин быыбарданнылар. Тыа сирин туруктаах буолуутун, сайдыытын түстэһэр, норуот талбыт баһылыктарыгар, дьокутааттарыгар үлэҕитигэр ситиһиини баҕарабыт.
-
9
-
0
-
0
-
0
-
0
-
0
