Кэккэлэһэ туруоруллубут уон истиэндэ икки өттүлэригэр икки кэм Дьоруойара: Аҕа дойдуну көмүскүүр Улуу сэриигэ ураты хорсун быһыыны көрдөрөн, Сэбиэскэй Сойуус Дьоруойун үрдүк аатын ылбыт итиэннэ Анал байыаннай дьайыыга Арассыыйа Дьоруойдарын үрдүк аатынан бэлиэтэммит биир дойдулаахтарбытыгар, 19 буойуҥҥа анаммыт экспозициялар оҥоһуллубуттар.
Быыстапканы арыйар миитиҥҥэ Илиҥҥи байыаннай уокурук командующайын байыаннай-бэлитиичэскэй үлэҕэ солбуйааччы, пуорум тэрийэр кэмитиэтин хос бэрэссэдээтэлэ генерал-лейтенант Роман Греков, «Норуот уонна аармыйа бииргэлэр» диэн фашизмы утары өрөспүүбүлүкэтээҕи үһүс пуорум тэрийээччилэрэ, куорат олохтоохторо уонна ыалдьыттара кыттыыны ыллылар. Тыл эттилэр.
Ил Түмэн Бэрэссэдээтэлин солбуйааччы – Ил Түмэн Байыаннай сулууспалаахтар, бойобуой дьайыылар бэтэрээннэрин дьыалаларыгар, патриотическай иитиигэ уонна уопсастыбаннай тэрилтэлэргэ сис кэмитиэттин бэрэссэдээтэлэ Александр Подголов маннык эттэ:
-- Бастатан туран мин махтаныахпын баҕарабын бу быыстапканы оҥорбут, тэрийбит дьоҥҥо, Байыаннай-историческай уопсастыба чилиэннэригэр. Маннык быыстапкалар дойду бары куораттарыгар, сэлиэнньэлэригэр элбэхтик тэриллэлэрэ олус наада. Бу быыстапкаларга Аҕа дойдуну көмүскүүр Улуу сэрии дьоруойдарын кытары билиҥҥи кэм дьоруойдара сэргэстэһэ тураллар. Экспозицияны кэрийэ көрө сылдьаммын, киэн туттунуулаах санааҕа куустардым: бу дьоруойдар үксүлэрэ мин сирэй билэр, билсэр дьоннорум. Бу уолаттар ыччаттарга холобур буолаллар. Бары бэрт көрсүө-сэмэй дьоннор, үрдүк күүрүүлээхтик саҥарары-иҥэрэри сатаабаттар. Биир холобуру аҕалыым, биир тэрээһиҥҥэ тылы Арассыыйа Дьоруойа Филипп Евсеевкэ биэрбиттэригэр балачча саҥата суох туран баран: “Доруобуйаны!” -- диэбитэ. Саала дохсун ытыс тыаһынан туола түспүтэ: дьон ис сүрэхтэн тахсыбыт тыллары истиҥник ылыммыта, Арассыыйа Дьоруойа дьиҥ дьыала киһитэ буоларын өйдөөбүтэ.
Бу быыстапка Емельян Ярославскай аатынан Саха түмэлин тиэргэнигэр бастайааннай туруоруллуоҕа. Дьэ онно уһуйаан иитиллээччилэриттэн саҕалаан, оскуола үөрэнээччилэрин уонна устудьуоннары сырытыннаран көрдөрөр наада – маннык Дьоруой буойуттар биһиэхэ баалларын биллиннэр уонна кинилэринэн киэн тутуннуннар.
Хаартыскаҕа Василий Кононов түһэриитэ.
-
4
-
0
-
0
-
0
-
0
-
0
