Уопсастыба

Кэмпириэнсиэйэҕэ өрөспүүбүлүкэ бары улуустарыттан 1 551 үөрэнээччи бэйэлэрин үлэлэрин аҕалан билиһиннэрдилэр. Тэрийээччилэр этэллэринэн, кэмпириэнсийэҕэ 10 тыһыынчаттан тахса сайаапка киирбит. Аартыкаттан уонна Өлүөхүмэ, Ленскэй улуустарын үөрэнээччилэрэ онлайн киэбинэн кыттыбыттар. Оҕолор үлэлэрин сыаналааһыҥҥа 400 эспиэрт, ол иһигэр, М.К. Аммосов аатынан ХИФУ, АГАТУ, РНА Сибиирдээҕи салаатын Саха Сиринээҕи киинин учуонайдара, «Якутия» технопаарка, Сайдыы корпорациятын исписэлиистэрэ үлэлээтилэр. Бастыҥ үлэлэри таллылар, элбэҕи сүбэлээтилэр-амалаатылар. Үөрэнээччилэри салайар педагогтар санаа атастаһыытыгар оскуолаларга билим кулууптарын тэрийэр туһунан этиини киллэрдилэр.

«Инникигэ хардыы»  өрөспүүбүлүкэтээҕи билим-быраактыка кэмпиэринсийэтин аһыллыытыгар 
Ил Дархан Айсен Николаев отут сыл устатыгар «Инникигэ хардыы» кэмпириэнсийэ оскуола үөрэнээччилэрин чинчийэр хамсааһыннарын сайыннарыыга бигэ тирэх буолбутун бэлиэтээтэ.
– Күндү оҕолор, мин эһиги ситиһиигитинэн киэн туттабын. Чинчийэр үлэлэргит таһымнара, билим да өттүнэн, олоххо туһаныллар да өттүнэн, сыллата үрдээн иһэрэ үөрдэр. Бу бырайыактаргыт көдьүүстээхтик туһанылларыгар баҕарабын. Саамай сүрүнэ — эһиэхэ чинчийээччи тыына уостубатын, билигэ-көрүүгэ тардыстыыгат, саҥа арыйыыларга дьулуһуугут уҕараабатын. Өрөспүүбүлүкэ кэнэҕэски академиктара, ректордара уонна салайааччылар эһиги кэккэҕититэн үүнэн тахсыахтарыгар эрэнэбин, – диэтэ Айсен Николаев.

Кэмпириэнсийэ үлэтин түмүгүнэн 44 хайысханан бастыҥ бырайыактар ааптардара бэлиэтэннилэр. Кыайыылаахтар уонна бириистээх миэстэлэргэ тиксибиттэр Бүтүн Арассыыйатааҕы, Норуоттар икки ардыларынааҕы куонкурустарга кыттарга мэктиэлэннилэр, дойду биллэр үнүбүрсүөттэригэр киирэргэ эбии баалы ыллылар, Арассыыйа Федерациятын Бэрэсидьиэнин истипиэндьийэтигэр күрэстэһэр кыахтаннылар итиэннэ ураты дьоҕурдаахтар Судаарыстыбаннай иһитиннэрэр кэрискэлэригэр киллэрилиннилэр.
Тоҕус оҕо Саха Сирин академиктарын аатынан истипиэндьийэни туттулар. «Юниор» диэн бырайыактыыр-чинчийэр үлэ өрөспүүбүлүкэтээҕи куонкуруһун түмүгүнэн 12 лауреат быһаарылынна.

Хамаанданан көрүүгэ дьоҕус дэлэгээссийэлэргэ Мирнэй улууһа, ортолорго Кэбээйи улууһа, бөдөҥнөргө Чурапчы улууһа бастаатылар. Үрдүк таһымнаах оскуолалар категорияларыгар Мирнэйдээҕи политехлиссиэй, эбии үөрэхтээһин тэрилтэлэригэр Мирнэйдээҕи эбии үөрэхтээһин киинэ, «Точка роста» номинацияҕа И.Н. Жирков аатынан Дүпсүн оскуолата бастаатылар. «Уопсастыбаннас талыыта» куонкуруска онлайн-куоластааһынынан робототиэхиньикэҕэ үлэлээх Михаил Матафонов (Мирнэйдээҕи политехлиссиэй, 7-с кылаас) бастаата. Куонкурус муҥутуур кыайыылааҕынан Саха Сирин киин оройуоннарыгар чеглок көтөрү утумнаахтык чинчийбит Айсен Борисов (Хаҥалас улууһун Ой оскуолата, 8-с кылаас) ааттанна диэн  Ил Дархан уонна Бырабыыталыстыба пресс-сулууспата суруйар.

Хаартыска: Саргын Скрябин, ЯСИА.