Болҕомто киинигэр Уһук Илиҥҥи федеральнай уокурукка бастакынан инновационнай түмэл кластерын төрүттээһин бырайыага турда. Бу бырайыак тоҕо чуолаан Уус Алдаҥҥа оҥоһуллара дириҥ ис хоһоонноох. Ол курдук, биһиги улууспутугар өбүгэбит Лөгөй Тойонтон саҕалаан, “Сахалар тустарынан былааны“ оҥорбут Сэһэн Ардьакыап, Василий Никифоров-Күлүмнүүр уо.д.а. курдук саха саарыннара төрөөн-үөскээн ааспыттара. Саха Сиригэр кэлбит бастакы хаһаахтар эмиэ биһиги улууспут сиригэр-уотугар түспүттэрэ, Арассыыйа судаарысты-бата Уһук Илин, Хамчаакка уонна Нуучча Эмиэрикэтин сирин-уотун баһылыыр аартыгын арыйбыттара.
Александр Подголовы кытары көрсүһүү Суоттутааҕы "Доҕордоһуу” түмэлиттэн саҕаланан, Сыгын Бороҕон өйдөбүнньүгүнэн эргийэн, Сэһэн Ардьакыап аатынан улуустааҕы түмэлгэ түмүктэннэ. Норуот дьокутаата кыраайы үөрэтээччилэр этиилэрин бэркэ болҕойон истэн баран, маннык эттэ:
-- Хас биирдии киһи аан бастаан төрөөбүт улууһун устуоруйатыгар ураты болҕомтону уурдаҕына, дойдуга бэриниилээх буолууга туһуламмыт хамсааһыннар саҕыллыахтара. Онон түмэл кластерын бырайыагын олоххо киллэриигэ тустаах бөлөхтөрү тэрийэн, саха-нуучча доҕордоһуутун көрдөрөн, Дьокуускай куорат олохтоммута 400 сылыгар бэлэмнэниҥ. Лөгөй уонна Бекетов XVI үйэҕэ дьиҥнээх баар буола сылдьыбыт дьоннор, кинилэри күүстээх номох оҥорор тоҕоостоох. Суорун Омоллоон мээнэҕэ Суотту сиригэр Доҕордоһуу түмэлин тэрийбэтэҕэ, саха-нуучча доҕордоһууларын туоһута манна олохтоммута. Лөгөй Тойон туһунан уус-уран кинигэни суруйтарыахха сөп, кини Уһук Илиҥҥэ, Сибииргэ уонна бүтүн Арассыыйаҕа сүҥкэн суолталаах өҥөнү оҥорбутун билинэр наада. Лөгөй Тойон аатынан өрөспүүбүлүкэ таһымнаах бириэмийэни олохтуур этиигит оруннаах. “Золотое кольцо Якутии” маршрутта бэлэмнээҥ, өйүөҕүм.
Бээрийэ кыыһа Хотойук Айгыына.
Хаартысканы ааптар ыытта.
-
11
-
0
-
0
-
1
-
0
-
0
