Уопсастыба

Үөрүүлээх тэрээһин ый халандаарынан кытай Саҥа дьылыгар сөп түбэһиннэрэн, илиҥҥи норуоттар үгэстэринэн ситэриллэн, киэргэтиллэн сонуннук ыытылынна.

Саҥа кииҥҥэ уопуттаах, идэлээх преподавателлэр Туйаара Дорофеева-Ким уонна Александра Хомус англия,  кытай уонна кэриэй тылларыгар умсугутуулаахтык үөрэтиэхтэрэ. Ону сэргэ логопед, алын кылаас учуутала Валерия Макарова оскуолаҕа киирэр эбэтэр ааҕыыны ыарырҕатар оҕолорго тус дьарыктарын ыытыаҕа.

Туйаара Ким, киин салайааччыта:

— Оҕо сылдьан хос эһэм Ким Ы Еры омуктуу суруллубут докумуонун булан ылбытым. Онно хос эһэм араспаанньата хайдах сурулларын өйдөөн хаалбытым. Арай биирдэ «Доширак» сии олорон, хаҕыгар “к” буукубата  оруобуна эһэм араспаанньатын курдук суруллубут этэ. Ону көрөн соһуйбутум. Кэнники билбитим, кэриэй тыла сүһүөхтэринэн суруллар уонна саха тылын курдук буукубанан ааҕыллар эбит. Онтон саҕалаан кэриэй тылын сыыйа үөрэтэн барбытым. Уопсайынан омук тылын кыра эрдэхпиттэн интэриэһиргиибин. Ол иһин оскуоланы бүтэрээт, англия тылын учууталын идэтигэр киирэн үөрэммитим. Ону таһынан Дьокуускайга кэриэй тылын куурустарыгар сылдьыбытым. Омук тылын баһылыырга төрөөбүт тылы билии улахан көмөлөөх. Саха тылыгар олус ыарахан дорҕооннор бааллар. Ону саҥарар оҕо ханнык баҕарар омук тылын түргэнник ылынар, өйдүүр буолар. Ол иһин кииммитигэр саха тылыгар эмиэ болҕомто уурабыт.

Бэлиэ түгэнинэн улуус дьаһалтатын социальнай коммуникацияҕа отделын салайааччыта Алена Пермякова, Саха сирин кэриэйдэрин түмсүүтүн тэрийээччитэ Михаил Дьячковскай, үөрэх  эйгэтин үлэһиттэрэ эҕэрдэлээтилэр.

Бу күн киин иитиллээччилэрэ кытай хоһоонун ааҕан иһитиннэрдилэр. Ону сэргэ илиҥҥи муусуканы пианиноҕа толорон, кэлбит дьону-сэргэни сөхтөрдүлэр. Маны тэҥэ иероглифтары суруйууга каллиграфия маастар-кылааһа буолла.

Варя Орлова, төрөппүт:

— Бу киин туһунан истэммин, тута игирэ кыргыттарбын өйөөммүн, суруттарбытым. Оҕолорум — 7-с кылаас үөрэнээччилэрэ,  кэриэй тылыгар дьарыктаммыттара биир ый буолла. Кэриэй алпабыытын, култууратын, ырыатын-тойугун үөрэтэн биллилэр. Дьарыкка нэдиэлэҕэ иккитэ үөрэ-көтө көхтөөхтүк сылдьаллар. Сэрэдэ, чэппиэр саамай күүтүүлээх күммүт буолла. Оҕолорум уһуйааччыларын Туйаара Михайловнаны сөбүлээннэр уонна омук тылын үөрэтиигэ көхтөнөн, билигин эбии англия тылын үөрэтиэхтэрин баҕараллар. Онон төрөппүт быһыытынан атын төрөппүттэргэ, оҕолорбут инники сайдыыларыгар олук ууран, араас дойдуну арыйан көрөллөрүгэр көмө буолан, «Тылдьыт» кииҥҥэ суруттарыҥ, олохтоох ыччаппыт сонун саҕалааһыннарын өйүөххэйиҥ. Саҥа киин кэҥээн, сайдан иһэригэр баҕарабын.

Марфа Петрова.