Түмэлгэ мустубут улуус олохтоохторо уонна ыалдьыттара саха төрүт култууратын уонна уран тарбахтаах уустар кистэлэҥнэрин кытары билистилэр.
ОЛ курдук, саха үгэс буолбут үрүҥ көмүс оҥоһуктарын уонна симэхтэрин үйэтитиигэ анаммыт икки маастар-кылаас ыытылынна. Көмүс ууһа Владимир Дарамаев үрүҥ уонна кыһыл көмүс киэргэллэри хайдах харыстыыр уонна барыарбыт, кэбирээбит оҥоһуктары чөлүгэр түһэрэр ньымалар тустарынан кэпсиирин таһынан, ону оҥорон көрдөрдө.
Уус Илья Лазарев саха дьахтарын биир саамай мааны уонна үгүс суолталаах төрүт киэргэлин — туораах ытарҕа — туһунан сиһилии кэпсээтэ итиэннэ ону хайдах оҥорору көрдөрөн биэрдэ, үөрэттэ.
Үөрэх кыттыылаахтара маастардар үлэлэрин олус сэргээтилэр, бэйэлэрэ оҥорбут ытарҕаларын тута астына кэттилэр.
Бу тэрээһини Афанасий Захаров салайааччылаах түмэл кэлэктиибэ саха норуотун ураты суолталаах уус идэтин кэлэр көлүөнэҕэ тиэрдэр уонна сайыннарар соруктаах тэрийдэ диэн түмэл МАХ сыһыарыыга ханаала иһитиннэрэр.
Хаартыска: А.А.Саввин-Өндөрүүскэ Саабын аатынан Чурапчы улууһунааҕы устуоруйа уонна этнография түмэлэ.
-
0
-
0
-
0
-
0
-
0
-
0
