Социальнай суолталаах 23 улууска 549 риэйсэ оҥоһуллубут, ол иһигэр субсидияламмыт тарыыбынан. Былырыын ону таһынан, 396 социальнай риэйсэ эбиллибит, онон 10800 киһи айаннаабыт. 14 Аартыка улуустарыгар эбии 10800 киһини илдьибиттэр. Күн бүгүн өрөспүүбүлүкэ авиахампаанньаларыгар 300 мөл. солк. иэс ситэ төлөнө илик. Ол туһунан Ил Түмэн экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэтин кэҥэтиллибит мунньаҕар СӨ Тырааныспарга уонна суол хаһаайыстыбатыгар миниистир солбуйааччыта Ольга Рафаилова иһитиннэрдэ.
Салгын суудунатын пааркатын хаҥатарга түөрт Ми-8 МТВ-1 бөртөлүөтү «ГТЛК»АУо чэпчэтиилээх лиизин бырагырааматынан быһыытынан ылбыттар, РФ национальнай уйгу-быйаҥ пуондатыттан үп көрүллүбүт.
Аэродромнары сайыннарарга федеральнай бырайыак иитинэн Ньурба уонна Полярнай аэропуордун оҥоруохтаахтар, 2026-2030 сс. Зырянкаҕа уу ылбат сиригэр аэропуорт тутуллуохтаах. Үбүлээһин кээмэйэ 16,8 млрд. солк. Ону таһынан, Өлүөхүмэҕэ аэропуорт саҥардыллыахтаах, Мииринэйгэ саҥа аэропуорт тутуллуохтаах.
«РФ Бэрэсидьиэнин Владимир Путин сорудаҕынан федеральнай таһымҥа салгын тырааныспарын инфраструктуратын сайыннарарга пуонда тэриллибитэ, ол үбүн аэропуортары саҥардарга ыытыахтара, үбүлээһин өрөспүүбүлүкэҕэ эмиэ көрүллүөҕэ. 2025-2030 сс. уопсайа 16 аэропуорка: Ленскэйгэ, Усть-Куйгаҕа, Муомаҕа, Хаандыгаҕа, Үрүҥ Хайаҕа, Орто Халымаҕа, Маҕаҥҥа, Өлөөҥҥө, Черскэйгэ, Сааскылаахха, Чокурдаахха, Саккыырыырга, Баатаҕайга, Тиксиигэ, Бүлүүгэ хапытаалынай өрөмүөн ыытыллыахтаах. Дьокуускайга перрон уонна салайар суол оҥоһуллуохтаах, уопсай сыаната 15 млрд. тахса солк. Хапыталынай өрөмүөн үлэтэ 2026 с. саҕаланыахтаах», — диэн билиһиннэрдэ Ольга Рафаилова.
Анал байыаннай дьайыы кыттыылаахтарын, гуманитарнай таһаҕаһы «Якутия» уонна «Полярные авиалинии» авиахампаанньа чэпчэтиллибит тарыыбынан таһаллар. Мобилизацияламмыт уонна баҕа өттүнэн Аҕа дойдуну көмүскүү барбыт буойуннар оҕолорун өрөспүүбүлүкэ тас өттүгэр чэбдигирдэр кииннэргэ сынньана баралларын хааччыйаллар.
Хаартыска: АЛРОСА хампаанньа.
-
0
-
0
-
0
-
0
-
0
-
0
