Быйылгы Олоҥхо ыһыаҕар бэйэлэрин түһүлгэлэрин аан бастакынан хотугу аҕыйах ахсааннаах омуктар бэрэстэбиитэллэрэ арыйдылар. Тэрээһин айылҕаны ыраастааһын сиэриттэн-туомуттан саҕаланна.

Бары ыалдьыттар күҥҥэ хайыһан туран, байылыат олоҕу көрдөстүлэр, баҕа санаа туолуутун саламатын ыйаатылар. СӨ Бэрэссэдээтэлин солбуйааччы Сергей Местников аҕыйах ахсааннаах хотугу норуоттар хотугу түһүлгэтэ арыллыытынан эҕэрдэлээтэ.

Сергей Васильевич Кэбээйи улууһун Сэбээн Күөлүгэр сылдьан оҕотуттан ытык кырдьаҕаһыгар диэри төрөөбүт тылларынан кэпсэтэллэрин истэн олус сөбүлээбитин аҕынна.

«Бэйэтин тылынан кэпсэтэр омук инникилээх, кэхтибэт кэскиллээх» диэн бэлиэтээтэ. Ил Түмэн аҕыйах ахсааннаах омуктар сис кэмитиэтин бэрэссэдээтэлин солбуйааччы Александр Сусоев хотугу улуустар бэрэстэбиитэллэрин эҕэрдэлииригэр өрөспүүбүлүкэҕэ олорор араас омук дьоно биир иллээх дьиэ кэргэн курдуктарын, бэйэ бэйэлэрин өйөһөллөрүн бэлиэтээтэ.

«Ил Түмэн уонна бырабыыталыстыба арктическай улуустарын сайдыыларын өрүү өйүүллэр. Онон хоту улуустарга улахан болҕомто оӈоһуллар», — диэн туран, Александр Сусоев көхтөөх уопсастыбанныктарга Ил Түмэн кырааматаларын туттарда. Ити курдук, аҕыйах ахсааннаах норуоттар түһүлгэлэригэр үөрүү-көтүү аргыстанан, Олоӈхо ыһыаҕар анаммыт тэрээһиннэри ыыталлар диэн https://sakha-sire.ru/author/elena-p/ Елена Потоцкая  Кэбээйи ыһыаҕыттан суруйар.

Бэлиэтээн эттэххэ, Кэбээйи улууһун Сэбээн Күөлүн дэлэгээссийэтэ Олоҥхо ыһыаҕар бөртөлүөтүнэн көтөн кэлбит.

Хаартыскалар Елена Потоцкая түһэриитигэр