Быһаарыы сурукка ыйыллыбытынан, бобуу биэс сыл устатыгар – 2027 сыл кулун тутар 1 күнүттэн 2032 сыл кулун тутар 1 күнүгэр диэри дьайыахтаах. Бу сокуон барыла 2026 сыл бэс сыйын 26 күнүнээҕи 188№-дээх федеральнай сокуон 5 ыстатыйатын 1 чааһыгар олоҕуран оҥоһулунна. Бу сокуон РФ субъектарын маннык хааччахтааһыннары 5 сыл устатыгар бэйэлэрэ биллэрэллэригэр боломуочуйалаах быраабы биэрэр.
Сокуон барылын оҥоруу Саха Сирин төрөппүттэрин, педагогическай уонна мэдиссинсикэй уопсастыбаннаһын көхтөөх көҕүлээһиннэрин түмгэ буолар диэн бэлиэтииллэр. Сокуон барылын ылыныы өрөспүүбүлүкэ бүддьүөтүттэн эбии үбүлээһини эрэйбэт. Ону тэҥэ, урбаанньыттар дохуот киллэринэллэригэр эбии ноҕуруусканы көрсүбэттэр.
Электроннай табахтары эбэтэр вейпиҥҥэ күүскэ наадыйыы 2013 сыллаахха дойдуга табаҕы уопсастыбаннай миэстэлэргэ тардыыны бобуу кэнниттэн саҕаламмыта. Электроннай табахтары оҥорооччулар бэйэлэрин табаардарын табахтан аккаастанарга көмө буоларын курдук көрдөрөллөр эрээри, онуоха кинилэр чахчы туһалаах буолуохтарын туһунан иһитиннэрии ханна да суох.
2019 сылга Доруобуйа харыстабылын тэрилтэтэ (ВОЗ) электроннай табахтар саастарын ситэ илик оҕолор доруобуйаларыгар улахан кутталы үөскэтэллэрин туһунан иһитиннэрбитэ. Никотин дьайыыта мэйии сайдарыгар буортулаах, обургу оҕолор уонна эдэр дьон ньиэрбэлэрин үлэтэ сайдыытын уонна тыынар уорганнарын айгыратыан сөп.
Хаартыска: Ил Түмэн пресс-сулууспата
-
1
-
0
-
0
-
0
-
0
-
0
