Уопсастыба

Ол туһунан кэпэрэтиип салайааччыта Екатерина Алексеевна Портнягина маннык кэпсээтэ:
– «Тымныы полюһа» кэпэрэтиип бэйэтин иһинэн тэриммит «Алгыс» кэпэрэтиибин сүөһүлэрин кыстатар отун биригээдэ туруоран уонна маннык «Күүлэйдэринэн» хааччынар үгэстээхпит. Быйылгы курдук ыарахан балаһыанньаҕа, халаан уута нэһилиэктэрбитин ылан, ходуһа барыта ууга баран, дьон-сэргэ аны кыһын сүөһүбүтүн хайдах кыстатабыт диэн санааҕа түһэн, дьиэлэрин-уоттарын быыһыыр, куурдар, чөлүгэр түһэрэр түбүккэ сылдьар кэмнэрэ буолан, үс эрэ хамаанда кытынна: Остуолба, Дьааҥы куорат уонна кэпэрэтиип бэйэтин хамаандата.

Бу күүлэйи биһиги «Алгыс» кэпэрэтиип 200-тэн тахса сүөһүтүн кыһын, сатаатар айан суола туруор диэри хааччыйар оппутун хайаан да булунуохпутун наада диэн сыаллаах тэрийдибит. Ону өйөөн, көмөлөһө кэлбит ыччаттарга олус диэн махтанабыт. Хамаандаҕа биэстии киһи: икки охсооччу уонна үс мунньааччы буолан сырыттылар, икки күн устата дьаныһан үлэлээтилэр.

Бириистэри «Полюс холода» кэпэрэтиип туруорда, ол курдук, бастаабыт хамаандаҕа 100 тыһыынча солкуобай, иккис миэстэни ылбыт хамаандаҕа – 80 тыһыынча солкуобай, үһүс буолбут хамаандаҕа 40 тыһыынча солкуобай, оттон биирдиилээн киирэн кыттыбыт охсооччуга уонна харбааччыга 10-нуу тыһыынча солкуобай харчыны олохтообуппут.

Икки күннээх дьаныардаах үлэ түмүгэр Дьуһаал Горохов капитаннаах Остуолба хамаандата 3,143 гектар ходуһа сирин отун охсон уонна мунньан бастакы миэстэҕэ таҕыста. Сергей Окоемов капитаннаах «Полюс холода» кэпэрэтиип хамаандата 2,46 гектар ходуһа сирин отун охсон уонна мунньан иккис миэстэни ылла.
Христофор Другин капитаннаах Дьааҥы куорат хамаандата 1,53 гектар ходуһа сирин оту охсон уонна мунньан үһүс миэстэни ылла.

Ону таһынан биирдиилээн киирсээччилэр биир күн үлэлээбиттэрэ. Онно Айгун Иванов 0,85 гектар сир отун охсон, Степан Находкин эмиэ 0,85 гектар охсуллубут ходуһа отун мунньан бастаатылар. Онон икки күн устатыгар барыта 8,93 гектардаах сир оттонно, туоннатыгар таһаардахха, ити – 14 туонна от.

Икки күн устата отчуттарбытын минньигэс саха аһынан күндүлээтибит. Күүлэйгэ кыттыбыттар бары үөрэн-көтөн тарҕастылар. Бэйэбит биригээдэбит билигин ити охсуллубут оту кэбиһэргэ турунна, инньэ гынан, ардах эрэ түспэтэр диэн көрдөһө олоробут. Өссө хас да «Күүлэйи» тэрийэргэ былаанныыбыт, онуоха кыттааччы элбэх буолуоҕар эрэнэбит. Өсө төгүл бары кыттыбыт оҕолорбутугар барҕа махтал буолуохтун.

Хаартысканы Кэскил Степановна ыытта.