Тыа хаһаайыстыбатын управлениетын начальнига Кэскил Степановна иһитиннэрбитинэн, улуус дьаһалтата «Тымныы полюһа» кэпэрэтиип бэйэтин иһинэн тэриммит «Алгыс» хаһаайыстыбатыгар оттооһуҥҥа көмөлөһөргө ыҥырыы оҥорбутугар, улуус тэрилтэлэрэ сөбүлэһэннэр, субуотунньуктуурга быһаарыммыттар.
Онон, уопсай сүбэнэн икки нэдиэлэҕэ үстүү күҥҥэ үлэлиир кыраапык оҥоһуллубут. Бу нэдиэлэҕэ бастакы күҥҥэ, ол эбэтэр, чэппиэргэ Кииннэммит библиотека, «Саханефтегазсбыт» Баатаҕайдааҕы салаатын үлэһиттэрэ кэлэн оттообуттар. Кинилэргэ ити күннэргэ Дьааҥы улууһугар оробуочай сырыынан кэлэ сылдьар Арассыыйа Дьоруойа, «Алеша» тааҥка наводчик-оператора Алексей Неустроев ыалдьыттаабыт.
Субуотунньук иккис күнүгэр, ол эбэтэр атырдьах ыйын 14 күнүгэр улуустааҕы киин балыыһа, «Авиалесоохрана» судаарыстыба бүддьүөтүн тэрилтэтин итиэннэ үөрэх управлениетын үлэһиттэрэ кэлэн үлэлээбиттэр.
Оттон бэҕэһээ улуус дьаһалтатын, «Ресурснай киин» муниципальнай аптаныамынай тэрилтэ, УЗиО, физкультура уонна спорт управлениетын, Суол пуондатын, Ис дьыала уорганын уонна тыа хаһаайыстыбатын управлениетын бэрэстэбиитэллэрэ үлэлээбиттэр.
Инньэ гынан, 12 тэрилтэттэн 57 киһи кэлэн, үс күн устата барыта 6,21 гектар ходуһа отун охсон, мунньан биэрбиттэр. Субуотунньук көхтөөх кыттыылаахтарын «Полюс холода» кэпэрэтиип омурҕан ахсын сибиэһэй, тотоойу аһылыгынан күндүлээбит. Аныгыскы субуотунньук атырдьах ыйын 20-22 күннэригэр ыытыллыахтаах, онно тэрилтэлэр эмиэ кыраапык быһыытынан солбуһа сылдьан үлэлиэхтэрэ.
«Полюс холода» кэпэрэтиип салайааччыта Екатерина Портнягина тус бэйэтин уонна кэлэктиибин аатыттан субуотунньукка кыттыбыт дьоҥҥо дириҥ махталын биллэрэр. Санатан эттэххэ, ааспыт өрөбүлгэ кини күүлэй тэрийбитэ, ол оту кэпэрэтиип биригээдэтэ урулуоннаата. Билигин оттуурун быыһыгар субуотунньукка охсуллубут оту дьаһайарга турунна. Кылгас сайыннаах, онуоха эбии халаантан эмсэҕэлээбит хоту дойдуга хас биирдии күн былдьаһык, үлэ киһитэ күндү, үтүө санаалаах дьон көмөтө улахан төһүү.
Хаартыска: Тыа хаһаайыстыбатын улуустааҕы управлениетын түһэриитэ.
-
1
-
0
-
0
-
0
-
0
-
0
