Балаҕан ыйын 18-20 күннэригэр дойду инники дьылҕатын быһаарар улахан быыбар буолла: Арассыыйа Федерациятын Судаарыстыбаннай Дууматын дьокутааттарын таллыбыт, Үөһээ Бүлүү-Горнай быыбардыыр уокуругар Ил Түмэн дьокутаатын эбии быыбара ыытылынна, сорох улуустарга, нэһилиэктэргэ дьокутааттар быыбарданнылар. Быыбарга барыта 334 312 киһи кыттыбыт, ити өрөспүүбүлүкэ быыбардааччытын 51,11 %-а.
Судаарыстыбаннай Дуума дьокутааттарын быыбарыгар Саха Сиринээҕи биир мандааттаах быыбардыыр уокурукка 9 хандьыдаат эрэгистирээссийэлэммитэ: Петр Шамаев («Биир ньыгыл Арассыыйа»), Айаан Васильев (КПРФ), Нюргуяна Заморщикова («Саҥа дьон»), Федот Тумусов («Сиэрдээх Арассыыйа»), Гаврил Парахин (ЛДПР), Владимир Ю («Арассыыйа хомуньуустара»), Анна Сыромятникова («От күөхтэр»), Алексей Лаптев («Ийэ дойду»), Анатолий Ноговицын («Яблоко»). Куоластааһын түмүгэ барыллаан маннык буолла: Петр Шамаев 37,31 %, Федот Тумусов 17,01 %, Нюргуяна Заморщикова 14,75 %, Айаан Васильев 12,47 %, Анатолий Ноговицын 6,55 %, Гаврил Парахин 3,63 % куолаһы ыллылар. Оттон баартыйалар испиэһэктэринэн быыбардааччылар куоластарын КПРФ-ка 24,73 % , «Биир ньыгыл Арасссыыйа» баартыйаҕа 43,02 %, «Саҥа дьон» баартыйаҕа 11,39 %, «Сиэрдээх Арассыыйа» баартыйаҕа 7,29 % биэрдилэр.
Ил Түмэн дьокутаатын мандаатыгар Үөһээ Бүлүү-Горнай быыбардыыр уокуругар эбии быыбарга түөрт хандьыдаат: Николай Долгунов («Биир Ньыгыл Арассыыйа»), Дмитрий Петров (КПРФ), Анатолий Лю-Фа («Сиэрдээх Арассыыйа»), Владимир Скрыбыкин («Саҥа дьон») эрэгистирээссийэммиттэрэ. Кинилэртэн Николай Долгунов 49,17 % куолаһы ылан, барыларыттан чорбойдо.
Маны таһынан 19 улууска 27 быыбардыыр хампаанньа ыытылынна. Ол курдук, Эдьигээн эбэҥки национальнай, Аллараа Халыма уонна Орто Халыма улуустарыгар итиэннэ сэттэ улууска 13 бөһүөлэк, нэһилиэк дьокутааттара талылыннылар. Хас да сиргэ улуус уонна нэһилиэк таһымынан эбии быыбар ыытылынна. Биир дойдулаахтарын итэҕэллэрин ылан, 193 дьокутаат, ол иһигэр, улуус таһымнаах бэрэстэбитэллээх уорганнарга 54 дьокутаат талылынна. Барыллааһын түмүк сарсын таһаарыллар эбит.
Сиһилии хаһыат бу нэдиэлэтээҕи нүөмэригэр билсиэххит.
Хаартыска: Ааптар түһэриитэ.
-
1
-
0
-
0
-
0
-
0
-
0
