Ол туоһутунан өрөспүүбүлүкэ социальнай ситимнэригэр суол мөлтөх туругун, алдьаныытын туһунан үгүстүк таһаараллар, дьүүллэһии барар. Он тэҥэ, сонуннары киэҥник тарҕатар сириэстибэлэргэ тутуу боппуруоһун туһунан билиһинэрии, кэпсэтии эмиэ тиһигин быспакка тахса турар.
Бүтэһик биир оннук кэпсэтиинэн соторутааҕыта СӨ Ил Дархана Айсен Николаев «Саха» НКИХ быһа эпиииригэр киирбит суругунан ыйытыкка хоруй буолар. Ол курдук, биир көрөөччү «Амма» суолун тутуу хайдах баран иһэрин, хаһан түмүктэнэрин туһунан ыйытыгар СӨ Тырааныспарга министэристибэтин хоруйа диэн информация социальнай ситимнэргэ тарҕаммыта.
31№-дээх Амма-Уус Маайа уокуругуттан Ил Түмэн дьокутаата, парламент тутууга, ОДьКХ уонна энэргиэтикэҕэ сис кэмитиэтин бэрэссэдээтэлэ Александр Корякиҥҥа тахсан, бу сибидьиэнэллэр төһө сөптөөхтөрүн, суолу тутуу хайдах баран иһэрин туһунан билсибиппитигэр, кини туһааннаах биэдэмистибэлэргэ сөптөөх ирдэбил ыытан баран маннык хоруйдаата.
-Суол туруга, тутуу боппуруоһа Саха Сирин салалтатын болҕомтотугар сылдьар. 2023 сылга Аммаҕа ыытыллыбыт успуорт адаптивнай көрүҥнэригэр өрөспүүбүлүкэтээҕи спартакиада кэмигэр инбэстииссийэ бырагырааматыгар киллэриллибитин туһунан биллэрбиттэрэ уонна 2024 сыл сайын суолу тутуу саҕаламмыта.
Билигин суолу тутуу үлэтэ «Куттала суох суоллар» федеральнай нассыыналынай бырагыраамаҕа киллэриллэн, төһө да уустуктардааҕын иһин тутуута, оҥоһуута салҕанар. Бастакы былаан быһыытынан 2028 сылга түмүктэниэхтээх диэн этэ, кэлин сыҕарытыллан билиҥҥитэ 2030 сылга турар, -диэн дьокутаат бэлиэтиир.
Оттон чопу СӨ Тырааныспарга министиэристибэтин хоруйугар суолу тутуу туһунан маннык этиллибит : «2026 сылга «Амма» массыына суолугар 38 килэмиэтиртэн 43 км диэри хапытаалынай өрөмүөн ыытылла турар. Үлэни толорууга "Мегинские автомагистрали" ХЭТ кытта хантараак түһэрсиллэн турар, суолу тутуу болдьоҕо 2026-2027 сс. Үлэни толоруу халандаарынай графигы тутуһуллан ыытыллар. Бу сылга суолга буору кутуу, кэҥэтии оҥоһуллар. Ону кытта үлэлиир хаттыгаһын хаҥаталлар, ууну аһардар турбалары олордоллор.
2026 сыл бүтүөр диэри бытарытыллыбыт тааһынан-кумаҕынан бүрүллэр хаттыгаһа оҥоһуллуоҕа. Суол бу учаастагар (38-43 км.) аспааллааһын уонна эксплуатацияҕа киллэрии 2027 сылга былааннанар.
Саха Өрөспүүбүлүкэтигэр суолу тутуу хайысхатынан «Амма» суолун тутуу биир сүрүн соругунан буолар уонна сылларынан тыырыллан, чопу үлэ ыытыллар, график быһыытынан баран иһэр , ол курдук: 54,5-71 км (2027-2029 сс.), 79-82,3 км уонна 86-90 км (2027-2029 сс.) реконструкциялааһын; 38 - 43 км (2026-2027 сс.), 155-173,5 км (2027-208 сс.), 71-79 км (2028-2029 сс), 43-54,5 км (2028-2029 сс.), 90-138 км. (2029-2031 сс.), 30,5-34,5 км (2030 с.) хапытаалынай өрөмүөн ыытыллан Амма улууһун киинигэр Амма Солобудатыгар тиийэ аспаалланыахтаах».
Чопчулаатахха, өрөспүүбүлүкэтээҕи «Амма» суола Мэҥэ Хаҥалас Аллараа Бэстээҕиттэн саҕалаан Чүүйэ сэлиэнньэтигэр диэри учаастага урукку сылларга аспаалланан турар. Оттон 2024-2025 сс. Бырама сэлиэнньэтин таһыгар 3 км уонна Амма сэлиэнньэтиттэн 30 км тахса тэйиччилээх суол учаастагар 20-тэн тахса км усталаах суол учаастага бу бырайыак чэрчитинэн суола оҥоһуллан, үрдэтиллэн аспаалланан турар. Оттон Амма Солобудатыттан Уус Маайа сэлиэнньэтигэр диэри учаастага 2022 сылга диэри устатын тухары толору оҥоһуллубута, үрдэтиллибитэ уонна гравийданан, сылы эргиччи үлэлиир тыраасса эрээтигэр киллэриллибитэ. Өрөспүүбүлүкэтээҕи суол Уус Маайа улууһун уһук соҕуруу Югоренок диэн бөһүөлэгэр тиийэн түмүктэнэр.
Бу Дьокуускайтан соҕуруулуу-илин тыргыллар аартык суол былыр-былыргыттан улахан суолталаах. 50-ча сыл анараа өттүгэр бу суол Бырама-Амма учаастага Саха Сиригэр биир бастыҥ хаачыстыбалаах, оҥоһуулаах суолунан биллэрэ, суоппардар суолу оҥорооччуларга махталлара улахан буолара. Даҕатан эттэххэ, ити кэмнэргэ Амматааҕы ДРСУ диэн суолу тутар-өрөмүөннүүр тэрилтэ таһаарыылаах үлэтэ, оччотоҕуга уһун кэмнэргэ салайбыт бочуоттаах суолу тутааччы Юрий Филиппович Чемезов аата бүтүн өрөспүүблүкэ үрдүнэн биллэрэ, холобурга сылдьыбыта.
Хаартыскалар Улусмедиа
-
0
-
0
-
0
-
0
-
0
-
0
