Аһаҕас истиини Ил Түмэн Бэрэссэдээтэлин солбуйааччы – Ил Түмэн бүддьүөккэ, үпкэ, түһээн уонна сыана бэлиитикэтигэр, бас билии уонна приватизация боппуруостаргар сис кэмитиэтин бэрэссэдээтэлэ Юрий Николаев салайар. Истиигэ Саха Өрөспүүбүлүкэтин Бэрэссэдээтэлин солбуйааччылар Ольга Балабкина, Сергей Местников, министиэристибэлэр, биэдэмистибэлэр, уопсастыбаннас бэрэстэбиитэллэрэ кытталлар.
Сүрүн дакылааттары экэниэмикэ миниистирэ Петр Попов, үп миниистирин эбээһинэһин толорооччу Иван Алексеев оҥордулар. Кэлэр 2027 сылга өрөспүүбүлүкэ судаарыстыбаннай бүддьүөтүн дохуоттаах чааһа 33,7 млрд., ороскуоттаах чааһа 340,3 млрд., дэписиитэ 2,7 млрд солк., 2028 сылга дохуота 375,8 млрд., ороскуота 378,8 млрд., 2029 сылга дохуота 337,2 млрд., ороскуота 340,2 млрд., оттон дэписиитэ икки кэнники сылга 3,03 млрд солк. буолара барылламмыт.
Тус (нолуоктанар уонна нолуоктаммат) дохуот кээмэйэ 2027 сылга 236,2 млрд. солк. буолуохтаах. Ол иһигэр нолуоктан киирэр дохуот 228,1 млрд., физическэй сирэйдэр дохуоттарын нолуога 66,7 млрд., тэрилтэлэр бас билиилэрин нолуога 23,9 млрд., сир баайын хостооһун нолуога 56,3 млрд., тэрилтэлэр барыстарын нолуога 67,4 млрд солк барылламмыт.
Федеральнай бүдьүөттэн кэлэр үп (дотация, грант, субвенсия, субсидия) 101 млрд солкуобайынан ааҕыллыбыт. Дакылааччыт кэлэр үп сороҕо билиҥҥитэ биллибэт, чопчу чахчылар иккис ааҕыыга баар буолуохтара диэтэ.
Үбүлээһиҥҥэ чорботуллар хайысха уларыйбат: үп нассынаалынай соруктары толорууга, социальнай эбэһээтэлистибэлэри толорууга, Анал байыаннай дьайыы кыттыылаахтарын уонна кинилэр дьиэ кэргэттэрин өйөөһүҥҥэ бастакынан ананар. Эрэгийинэнээҕи нассынаалынай бырайыактарга 49,4 млрд., ол иһигэр 38,2 млрд солк федеральный бүддьүөттэн көрүллүөхтээх. 2027 с. инвестбырагыраамаҕа 38,9 млрд., ол иһиттэн 9,9 млрд солк өрөспүүбүлүкэтэн тыырыллар.
Санатан эттэхэ, сокуон барыла кэмитиэттэринэн көрүллүбүтэ, кэлэрэ нэдиэлэҕэ, ол эбэтэр алтынньы 21 күнүгэр Ил Түмэн пленарнай мунньаҕар киллэриллиэҕэ.
Хаартыска: Василий Кононов.
-
2
-
0
-
0
-
0
-
0
-
0
